Nongstoiñ, Jymmang 31: Ka lyer jong ka election na ka bynta ka Party NPP ha Nongstoiñ, ka la nang beh bad la sakhi ba na ka por sha ka por katei ka party, ka la ïoh ban pdiang sngewbha ïa ki dkhot ba thymmai bad kumjuh ïa kito kiba wan pynïasoh na kiwei pat ki party. Katei ka jingpynïasoh jong ki paidbah ban long dkhot ha ka NPP ka la ai mynsiem ïa ka party NPP ba kan dang ïoh ban bat biang ïa ka jingjop ha ka election MLA 2023.
Ha Nongpyndeng kaba dei kawei na ki shnong kaba la don palat ïa ka 3 hajar ngut ki nongthep vote, la sakhi ba ki paidbah katei ka shnong ki la mih shakhmat ban pyni ba ki don ïa ka mynsiem ba shitrhem ym tang ban pynjop biang ïa u Bah Macmillan Byrsat u ba long u MLA ba mynta. Hynrei ban da pynjop kput, namar ki kam bad ki jinglah jong u ban wanrah ïa ki kam pynroi kumjuh ki jingïarap ïa ki longïing ba duk ba suk ha kane ka shnong.
Ïa katei la sakhi lyngba ka jingïalang kaba la long ha ka 30 tarik ha Dorbar Hall jong ka shnong Mawkhlam-Nongpyndeng, ha kaba da ki spah ngut ki paidbah ki la wan sha katei ka jingïalang na ka bynta ban pdiang burom biang ïa ki 74 ngut ki nongkyrshan ba dang wan ban pynïasoh thymmai sha ka Party NPP.
U Bah Tender Sohphoh, u ba long uwei na ki nongïalam Congress ba shitrhem bha ha kine ki snem ba la dep, u la pynpaw ba ka jingwan pynïasoh jong u bad ki paralok sha ka party NPP, ka dei namar ba ka jingnang ring sdot jong ka Party Congress, namar ka jingïapher jingmut hapdeng ki nongïalam kaba la wanrah ïa ka jingpait jingpra hapoh ka party.
U la ong ruh ba u la jied ban pynïasoh noh sha kane ka Party NPP, namar u ïohi ïa ki kam kiba une u MLA ba mynta u la leh na ka bynta ka dong ka thaiñ bad kumjuh na ka bynta u duk u suk. Ki kam kiba u MLA u la leh ka la pynshoh jingmut ïa u ban pynïasoh noh bad kane ka party, na ka bynta ban ai ka jingkyrshan ba shitrhem ba un ïoh biang ïa ka jingjop ha u 2023.
Na ka liang u MLA bah Macmillan Byrsat u la ïoh ban pdiang burom ïa kitei ki dkhot ba thymmai, da kaba pyndeng ruh ïa ka lama jong ka NPP bad ai mynsiem ruh ïa baroh ki dkhot ba dang wan pynïasoh thymmai, ba kin shim ba ka party NPP ka dei ka party jong ki bad trei shitom ban wanrah biang ïa ka jingkylla ha ka dong ka thaiñ.
U la jer ruh ïa ki katto katne ki kam kiba na ka liang jong u lyngba ka sorkar MDA, ka la leh na ka bynta ban kyntiew ïa ka dong ka thaiñ, kynthup ban pynïoh tulop sorkar ïa ki nonghikai ka Nongstoiñ College, ka jingshna pynbha ïa ka ïing skul jong ka Sib Singh Memorial Govt. Higher Secondary School, ka jingwanrah ïa ki scheme shna surok ha kylleng ki shnong jong ka Constituency.
U la jer ruh halor ki scheme shimet na ka bynta ki longïing baduk, ka jingweng noh ïa ka jingpynïathoh ar sien, ka jingpynphai biang ïa ka jingleh ïa ki birth certificate na kashari sha DC ophis, ka Land Bill, ka kam ïa pynbeit khappud, ka them motor, ka ILP, ka jingïakren ïasuk bad ki seng kieng atiar bad kiwei kiwei ki kam kiba kane ka sorkar ka la leh na ka bynta ban weng noh ïa ka jingeh ba ki paidbah ki ïakynduh.
