Riangdo, Jylliew 12: Ki longkmie longkpa bad ki samla na kiwei seng saiñ pyrthei bapher bapher hapoh Mawshynrut constituency, ha ka sngi saitjaiñ jong ka taiew ki la pynïasoh noh sha ka National People’s Party, ha ka jingïalang paidbah kaba la long ha ka shnong Umdang ha Mawshynrut Civil Sub Division jong ka West Khasi Hills District.
Nalor kitei ki nongkyrshan jong ki party bapher bapher la sakhi ruh ïa u MDC barim ka Mawshynrut Constituency, u bah Morning Mawsor ha ryngkat ki 300 ngut ki nongbud jong u, ki la wan ban pynïasoh lang sha ka NPP ha katei ka jingïalang ha Umdang. Ka sur kaba mih na kane ka jingialang ha Umdang ka long ba ka NPP kan jop kput ha u 2023.
Ïa kitei ki ba la wan pynïasoh thymmai sha ka NPP la pdiang burom da u MLA ka thaiñ, u ba dei ruh u President ka NPP Mawshynrut Block u bah Gigur Myrthong, ha ryngkat ka jingïadonlang u MDC ka Rambrai Jyrngam u bah Bajop Pyngrope, ki nongkitkam ka party NPP lem bad ki hajar ngut ki paidbah nongkyrshan ka NPP.
Ha ka jingpdiang sngewbha ïa kitei kiba la wan pynïasoh thymmai sha ka Party, u MLA ka Mawshynrut u bah Gigur Myrthong u la ong ba ha ki por kiba mynshwa ka shitom bha ban ïawer ïa ki paidbah ban rung sha ka party NPP. Hynrei ha kine ki sngi ki paidbah ki la kloi ban wan pynïasoh hi dalade sha ka NPP, namar ki la ïohi ïa ki kam ba ka NPP ka la leh ha ka jingïalam ka sorkar MDA ha kine ki saw snem.
“Ha ka jinglong MLA jong nga ha kine ki saw snem, nga la lah ban wanrah ïa shibun ki kam pynroi hapoh ka Constituency. Hynrei ki dang don ruh shibun kiba dang hap donkam ban leh ïa kaba yn nym lah ban pyndep tang hapoh ka san snem”, ong u bah Gigur Myrthong.
