Nongstoiñ, Naiwieng, 8: Ha kine ki sngi ki kyrtong jong ki lai constituency jong ka West Khasi Hills ba kynthup ïa ka Nongstoiñ, Mawshynrut bad Rambrai Jyrngam ki la duh thiah duh dem bad ki la durut khait ban tur sha ki shnong ki thaw ban ïakynduh ïa ki paitbah nongshong shnong, ban thaw ïa ki shnat treikam ba la tip kum ki primary unit naduh ki rangbah, ki longkmie bad ki samla na ka bynta ba kin trei shitom ban pynjop ïa ki ha ka election ban wan.
Napdeng ki lai tylli ki constituency haduh mynta ka Mawshynrut ka dei ka constituency kaba dang don tang lai ngut ki kyrtong kata u bah Methodius Dkhar na ka HSPDP, u bah Gigur Myrthong na ka NPP u ba long ruh mynta kum u MLA bad u bah Justine G.Momin na ka Trinamool Congress.
Haba pyrshang ban twad jingmut na ki paitbah jong ka Mawshynrut Constituency kaba ïadei bad ka election ha u snem ban wan, ki la ong ba ka jingïaleh ka long kaba khluit haduh katta katta, hynrei kumba ka long mynta u kyrtong ka HSPDP u don ka jingkyrmen kaba skhem ba un jop namar ba ki paitbah ki la ngiah ïa u MLA ba mynta.
U bah Kodang Rashir u nongïalam ba satar jong ka Consgress uba la wan ban pynïasoh bad kyrshan ïa ka HSPDP u la ong ba ha ki snem ba la dep baroh ki paralok Garo kim ju kyrshan ïa ka HSPDP namar kim pat sngewthuh. Hynrei ha kane ka election ban wan ki don palat hajar ngut ki paralok Garo kin wan ban kyrshan ïa ka HSPDP.
Ha kaba ïadei bad ka Nongstoiñ constituency pat ka haduh mynta ki la don ki la don haduh hynriew ngut ki kyrtong u bah Macmilan Byrsat na ka NPP uba long ruh u MLA ba mynta,u bah Makmilan Kharbani na ka All India Trinamool Congress AITC , u bah Polestar Nongsiej na ka UDP, u bah Gabriel Wahlang na ka Congress, u bah Sanjiedkynsai Shangrit na ka HSPDP bad u bah Boby Kharchandy kum u kyrtong shimet bad lah ban dang don ruh sa uwei na ka BJP wat la ym pat pynbna ruh.
Haba pyrshang ban twad jingmut na ki paitbah jong ki shnong bapher bapher jong ka constituency la ong ba ha ki snem ba la dep ki paitbah ka Nongstoiñ constituency baroh kawei kim pat kheiñkor ïa ka UDP hynrei ha kane ka kynti pat katba nangmih ki sngi ka UDP ka la nang ïoh mynsiem na ka jingwan pynïsoh jong ki paitbah.
U bah L.G Nongsiej haba ïakren bad u nongthoh khubor u la ong ba haduh mynta tang ki nongkitkam jong ki Primary Unit ba kyntup naduh ki rangbah, ki longkmie bad ki samla ki la poi palat hynriew hajar ngut bad katba nang mih ki sngi kiba wan pynïasoh sha ka UDP kin nangkham bun.
Haba phai pat sha kiwei ki kyrtong u bah Makmilan Kharbani jong ka TMC ruh haduh mynta u la ïoh ban thaw palat 42 tylli ki shnat trei kam bad tang ki nongkitkm bad ki dkhot kiba la wan ban pynïasoh ki la don palat arhajar ngut.
Na ka liang ka NPP, Congress, UDP bad HSPDP haduh mynta ym pat ïoh jingtip haduh katno tylli ki shnat trei kam ka la lah ban thaw, hynrei haba pyrshang ban wad jingtip na kylleng ki shnong palat marshiteng na ki shnong hapoh ka Nongstoiñ Constituency ki la khih khohreh bha.
Haba phai pat sha ka Rambrai Jyrngam consti-tuency haduh mynta ki kyrtong kiba la dep pynbna ki dang don tang saw ngut kata u bah K.P.Pangñiang na ka HSPDP u ba dei ruh u president rangbah jong ka party, u bah Kimfa S.Marbañiang uba dei ruh u MLA ba mynta u ba la jop na ka party Congress, hynrei uba la shah suspend noh hadien ba u la leit ban ai jingkyrshan ïa ka sorkar MDA ba la ïalam da ka NPP bad u ba la rung noh shi syndon sha ka NPP, u bah Goldenstar Nonglong na ka Congress bad u bah R.G.Momin u kyrtong shimet.
Nalor kata ki ar tylli ki party ka AITC bad ka BJP kim pat pynbna ïa ki kyrtong hynrei kat kum ki jingtip ba la ïohlum la ong ba ka BJP ka don arngut ki ragbah ki ban aplai u bah S.Nongrem uba dei ruh u Chiefe Organiser jong ka party ha Rambrai Jyrngam bad u Francis Pondit R.Sangma MLA barim ka Mawshynrut uba la trei shitom bad duh thiah duh dem ban tur sha ki shnong ki thaw ban pan jingkyrshan na ki paitbah.
Nalor kata ka All India Trinamool Congress ruh ka don arngut ki ban sa aplai tiket u bah Fernandes Dkhar u ba long ruh u State Youth President jong ka Meghalaya Pradesh Trinamool Congress bad ka kong Aicyful Kharmu-sulman. Kitei baroh ar ngut ki la trei shitom bad ki la tur ha kylleng ki shnong ban pan jingkyrshan na ki paitbah. Ym lah ban len ba ka election ha u snem ban wan kan dei ka election kaba khluit tam na ki election baroh kiba la dep long bad ka saiñ pyrthei kan kylla bak ly bak na kaba ju long baroh shi katta.
