Kyrmen ka RDA ban ïoh biang ïa u MP na ka party Riewlum hadien 46 tylli ki snem

Mawkyrwat, Rymphang 14: Ka Regional Democratic Alliance (RDA) jong ki ar tylli ki seng saiñ pyrthei jong ka Ri Khasi Jaiñtia ka UDP bad ka HSPDP ha ka 14 tarik u Rymphang, 2024 ka la hiar ha Mawkyrwat Consti tuency ban sdang ïa ka jingïalap elekshon na ka bynta ban pan jingkyrshan na ki paidbah na ka bynta u bah Robertjune Kharjahrin u kyrtong ïa monlang jong ka RDA u ban sa ïa aireng ha kane ka MP Election jong ka Lok Sabha na Shillong Parliamentary Seat.
Haba kren ha ka jingïalang, u bah Metbah Lyngdoh u la ong ba kam don jingeh ei ei lada kine ki ar tylli ki Seng Riewlum kin ai ka jingïatreilang ha kane ka Elekshon MP jong mynta u snem bad um ïohi ba u lyoh un kah dum bad ki kjat sngi kin shai kdar ban ïohi ïa ka jingjop don burom u bah Robertjune Kharjahrin kum u MP monlang jong ka RDA. Shuh shuh u la ong ruh ba balei kine ki ar tylli ki party ki ïa don lang mynta hangne ka daw ka long hadien ba ki la pynlong shibun ki jingïakynduhlang hapdeng ka UDP bad ka HSPDP ba ki paidbah ki ju buh ka jingkylli, Balei ki party Riewlum ki ïa paid ïa pra bad kim don ka jingïatylli ban ïa trei lang? Ka jubab kaba shai ka long balei nga wan ban pynlut kai ïa ka por hangne ha Mawkyrwat ban pynshai ïa ka jingïatylli jong ngi kum ki party Riewlum bad u sngewkmen ba ki paidbah kiba don ka juh ka mynsiem kumba kine ki ar tylli ki party bad ki don ha kajuh ka thong da kaba ïa tylli lang kawei da kaba ki ïa klet noh ïa ki jingduna baroh ban ïaid shakhmat ha ka jingïatrei lang hapdeng ka UDP bad ka HSPDP.
Shuh shuh u la ong ruh ba u ju sngap bad ban pan jingmut na ki riew rangbah, ki tymmen ki san kiba la kham san ïa u bad kumjuh ruh na ki longkmie longkpa bad ruh na ki samla ha shwa ban yn leh ïa kino kino ki kam ki ban pyntyllun ïa ki kam ha ka imlang sahlang bad ha ka synshar khadar.
U bah K.P. Pangniang pat u la pynshai ha kaba ïa dei ban ka jingïatrei lang ka party UDP bad ka HSPDP ha kane ka MP Elekshon, da kaba ong ruh ba ha kane ka elekshon MDC bad MLA ka ban sa wan ngin dang ïa treilang kumjuh khnang ngin sa ïohi biang ïa ka jingkhlaiñ jong ki party Riewlum bad ban wanrah biang ban ïoh biang ïa ka bor shynshar da lade hi ha ka jylla Meghalaya bad ngin ïoh i biang ruh ïa u MP na ka party Riewlum kata hadien ki 46 tylli ki snem ba ngi la duhnoh ban bat ïa ka bor shynshar.
Haba kren ïa ki mat kiba kongsan jong ka jaitbynriew, u bah K.P. Pangniang u la ong ba, “Ban pynneh, pynbha bad ban ai ka jingïada ïa ka jaitbynriew, u la ong ruh ba ngim ïoh MP shuh na ka party Riewlum la 46 snem kata khaduh ha ka por jong u (Late) G.G. Swell Lyngdoh bad u (Late) Hoping Stone Lyngdoh namarkata, kyrmen ba ha kane ka kynti ba mynta ngin sa ïohi biang ïa u MP uba biang kata ïa u Robertjune Kharjahrin lyngba ka jingïatylli hapdeng ki ar tylli ki party Riewlum.
Ha kajuh ka por u bah K.P. Pangniang ula kren ruh na ka bynta ka party kaba dang shu mih kata ka Voice of the People Party (VPP) kaba ju kren ban wanrah ka jingkylla na ka bynta ka synshar khaddar hapoh ka Ri Khasi. “Kumno ki lah ban kam ba ngi ieid ïa ka ri bad ka jaidbynriew, hynrei u bah Ardent Miller Basaiawmoit ha shwa ba un thaw ïa ka party VPP u la don ha kata ka seng Riewlum kaba ïada kaba don kajuh ka thong na ka bynta ka jaidbynriew da kaba mih noh na ka UDP, HSPDP kaba la shakri ïa ka jaidbynriew ha ki 40 snem tam mynshwa da kaba thaw thymmai pat mynta da ka party VPP ban wanrah ka jingkylla? Shano kane kan ïalam? ong u bah K.P. Pangniang.
U Robertjune Kharjahrin haba kren kum u kyrtong u la pynshai ïa kito ki briew kiba buh jingkylli ïa nga ba balei u ïaleh ïa ka MP Elekshon bad ba um sdang shwa ban na ka Elekshon MDC ne MLA. Ban jubab ïa kata, u bah Robertjune u la pynshai ïa ki paidbah ba u kwah ban ïaleh ïa kane ka elekshon MP ka long ba shibun ki sohkyrdot, ki mat jingdawa jong ka jaidbynriew kum ka ILP, u pud u sam, ban pynkhlaiñ shuh shuh ïa ka Six Schedule, bad shibun kiei ki ei ba naka liang ki sengbhalang, ki MDC bad MLA ki ju dawa manla ka por bad kumjuh ruh ka ka party UDP bad HSPDP kiba don kajuh ka thong hynrei haduh mynta ki dang sah kut hapoh Delhi ha Parliament.
Ha ka jingïalang paidbah ba la pynlong mynta ha madan kaba don hajan jong ka Ïingmane COG, Mawkyrwat la ïadonlang naduh u MLA ka thaiñ, nangta u Ma Kyrmen Shylla, MLA ka Khliehriat ka uba bat ruh kum u Myntri jong ka Home (Passport) Department, Legal Metrology Department, Revenue & Disaster Management Department, Excise Department, u bah Pius Marweiñ, MLA ka Ranikor Constituency, u bah Ollansing Suiñ, MLA ka Mawsynram Constituency lem bad kiwei de ki ‘riew rangbah jong ka party UDP bad HSPDP.