New Delhi, Jymmang 11: U Coach jong ka team Phutbol ka India, u Igor Stimac, u kyrmen ba ka India kan ïoh rung sha ka Asian Cup 2023 namar ka jingwanphai biang u nongïalehkai ba tbit tam jong ka ri, u Sunil Chhetri.
U Sunil uba la 37 snem ka rta, u la sangeh ïalehkai mynta la 6 bnai hadien ba u la mynsaw ha ka jingïalehkai pyrshah ïa ka Nepal ha SAFF Cup.
Ha ka jingïaknieh ban ïoh rung sha ka AFC Asian Cup, ka India ka don lang ha kajuh ka Group D bad ka Hong Kong, ka Afghanistan bad ka Cambodia. Baroh lai tylli kine ki ri kidei kiba don kham sha trai jong ka India ha ka FIFA Ranking.
U Stimac u la ong ba ka jingwanphai u Chhetri kan long kaba donkam bha ïa ka team namar ba ym dei ba u long tang u Kapten, hynrei kan dei ruh ka jingai mynsiem ïa ki para nongïalehkai baroh. “U dei u nongïalehkai uba la tbit bad ïalehkai la bun bun snem na ka ri. Ka jingdon jong u kan ïarap shibun ïa ka team”, la ong u Coach hadien ba kut ka jingkilan met. Hynrei wat lada jingwanphai u Chhetri ka long ka jingkmen ïa ki nongialehkai bad ïa k team baroh kawei, pynban ka jingbym lah ban ïalehkai uwei pat u forward ba dang khynnah, u Rahim Ali kan pynthut shibun ïa ka rukom ïalehkai, namar ba u Rahim u la long u nongkyrshan ba biang bha ïa u Sunil haba ïalehkai shakhmat. U Rahim u la mynsaw bad un nym ïalehkai ha kibe ki 6 taiew ban wan.
Ha shuwa ka Qualifier, ka India kan ialehkai kilan met shuwa ba ka ATK Mohun Bagan bad ka I-League All Stars ha shuwa ban leit sha Doha ban ïalehkai paralok bad ka Zambia bad Jordan.
U Stimac, u la ong ruh ba ka jingïalehkai paralok ba ka India ka la ïakhun ha kine ki bnai baladep pyrshah ïa ka Bahrain bad Belarus ki la long ka jingmynroi na ka bynta ki nongïalehkai jong ka ri India. Namar wat hapdeng ka jingbym lah ïalehkai u Sunil Chhetri ruh bad wat la ka team ka la mad jingrem, hynrei ki nongialehkai pat ki la ïoh jinghikai shibun bha.
Ka Aian Cup 2023 kan long ha China, ha kaba 13 tylli ki team ki la dep rung bad sah sa 11 tylli ki ban pyndap ia ka lympung ba 24 team. Na kine ki 11 kiba dang sah, hynriew tylli kin ioh rung na ki top team jong ki group bad 5 tylli pat ki best runners up.
