Kyrmen ka HNYF ban siang rong noh ka sorkar jylla ïa ki lai tylli ki surok ba kongsan ha Ri Bhoi

Nongpoh, Lber 27: Ka HNYF Northern Region ka don ka jingkyrmen kaba khraw ba ka sorkar jylla kan siang rong noh ïa ki lai tylli ki surok kiba la shah ktah bha ki paidbah ha ka leit ka wan na ka daw ka jingsniew palat ka surok bad ka seng ka la pynpaw ruh ba ka don ka jingkyrmen ka dei hadien ba ka la wan ban kynduh ïa u symbut myntri ka jylla bad uba dei ruh u myntri ba dei peit ïa ka tnad PWD, u Bah Prestone Tynsong, uba la kular ban shim khia na ka bynta ban pynbha noh ïa ki lai tylli ki surok ha Ri Bhoi District.
Kitei ki lai tylli ki surok ba ka seng HNYF ka la pynher da ka jingthoh bad kynduh ruh ïa u symbut myntri ka jylla, u Bah Prestone Tyngsong dang ha ka 22 tarik u Lber 2022, ka dei ka surok Mawhati, ka surok na Nongpoh-Umden-Umjari bad ka surok na Umrit sha Umling, ha kaba kine ki surok ki la ktah shisha ha ka leit ka wan ki paidbah ba ki paidbah la bun phew snem mynta ki shem jingeh shisha ha ka leit ka wan bad ka kit ka bah kaba dei na ka daw ka jingsniew kaba la ktah sha bapat ïa ki paidbah.
Kum ban pynkynmaw, ka seng HNYF Northern Region na Ri Bhoi District ha ka 22 tarik u Lber 2022 ka la leit ban kynduh ïa u Symbut Myntri ka jylla, u Bah Prestone Tynsong ba la ïalam da u Bah Marcus Marten kum u President bad ruh ha ka jingdon ryngkat u President ba rangbah ka HNYF, u Bah Sadon Blah lem bad kiwei kiwei ki nongïalam na ka District.
Haba ïa kren bad ki Nongthoh Khubor, u Assistant Secretary ka HNYF Northern Region, u Bah Donroy Kshiar, u la ong ba ka seng ha kawei ka bynta ka pynpaw ka jingkmen ba shen hadien ba la wan kynduh ka seng ïa u symbut myntri ka jylla bad kumba u la kular ha ka 24 tarik u Lber 2022 pat u Symbut myntri u la pynbna ba shen ka sorkar kan pynlait noh ïa ka Tender ban siang rong ïa ka surok Mawhati.
“Ka seng ka sngewkmen ruh ba u symbut myntri u la kular ruh ban shim khia noh na ka bynta ban siang rong ym tang ïa ka surok Mawhati kata na Umsning-Mawhati-Umsiang bad u la kular ruh ban shim khia ruh ïa ka surok na Nongpoh-Umden-Umjari bad kynthup ruh ïa ka surok na Umrit sha Umlling yn pyndep noh tang hapoh ka 3 snem” ong u Bah Donroy Kshiar, Assistant Secretary ka HNYF, Northern Region bad bynrap ruh kum ka seng ruh kam lah khlem da ai khublei ïa u symbut myntri bad kumjuh ruh ïa ka sorkar jylla, namar ka jingshim khia ban siang rong noh ïa kitei ki 3 tylli ki surok ha Ri Bhoi kan long ka jingkyrkhu ïa ki paidbah ka Ri Bhoi bad wat ïa ka jylla hi baroh kawei” u la bynrap.
Na ka liang u Bah Donroy Kshiar u la ong ruh ba ka seng ha kawei ka bynta ka kyntu ruh ïa ka sorkar jylla ha kaba dei bad ka jingbhah kam ïa ki Contractor ban trei ïa kitei ki surok kam dei ban shu ai beit tang ïa ki briew ba don jingïadei bad ka sorkar, hynrei ka sorkar ka dei ruh ban bhah kam ïa ki Local Contractor, namar kane ka long ruh shi bynta ban ai kam ai jam ïa kiwei pat ki Contractor kiba ym don kam don jam bad ym ban shu phai khmat tang sha kito ki Contractor kiba la paw ha ka jylla.
Shuh shuh, u la ong ruh ba ka seng ka khmih lynti ba kumba u symbut myntri ka jylla u la kular ban siang rong noh ïa kitei ki surok ha Ri Bhoi bad kane ka jingkular kan urlong bad lada ka urlong ka jingmyntoi kan long shisha ïa ki paidbah ka Ri Bhoi kiba la donkam shisha ban ioh da ka surok kaba bit ba biang kumba la pynpaw da ka seng haba ai ïa ka jingthoh sha symbut myntri ka jylla, la bynrap u Bah Donroy Kshiar, Assistant Secretary ka HNYF, Northern Region.