Kyrduh um ki 2 shnong haka thaiñ Killing, lap ba shah khlong haduh 27 tylli ki pipe um ka skhim JJM

Nongpoh, K’Lyngkot 08: Ki paidbah nongshong shnong jong 2 tylli ki shnong ha Ri-Bhoi ba kynthup ïaka shnong Jorbil bad ka shnong Umlangpur haka thaiñ Killing kila hap ban mad ka jingkyrduh um hadien ba ki nongtuh bym lah satia ban ithuh kila rong tuh haduh 27 tylli ki pipe um bala dep pyndait bad pynpoi um sha ki thliew iing ha kitei ki shnong lyngba ka skhim JJM.
Kum ban shu kdew hangne ba ka sorkar kala mang haduh 3 klur naka bynta ban pynpoi umbam umdih sha kitei ki 2 tylli ki shnong, hynrei lyngba kane ka jingshah tuh kala wanrah ka jingduhnong kaba khraw ïaki paidbah nongshongshnong kiba la hap ban mad ïaka jingkyrduh um.
Kumba la ioh lum jingtip kane ka jingshah rongtuh bad jingshah khlong ki pipe um ha kitei ki shnong ka paw pyrthei hadien ba ki paidbah nongshong shnong kila ud la nam sha ki bor shnong halor ka jingbym poi um shuh sha ki thliew iing, bad kum ki bor shnong kila leit ban jurip ban lap ïaka daw tynrai ka jingbym poi um sha ki thliew iing bad haka jingjurip la lap pynban ba ki runar kila dep ban khlong bad rong lut ïaki pipe um kiba pynpoi um sha paidbah kiba don kumba 27 tylli eiei.
Tang mar sien ïohi ba ki pipe um kila jah lut naka jaka ba ring um naki tyllong, naka liang ki bor shnong ryngkat ki pulit kila leit ban jurip lang ïa katei ka jaka bad kum ki bor shnong kila ujor syndon da ka ejahar ha Khanapara Police Station ban thwet ïaki runar kiba donkti ban tuh ïakitei ki pipe um.