Nongstoiñ, Nailur 23 : Ka ophis jong ka tnad ai jinghikai ïa ki samla kaba la tip kum ka Industrial Training Institue (ITI) kaba don ha ka shnong Nongsohpian kaba jngai tang kumba shi pda maw na ka surok bah National Hingway 44(E) Shillong –Tura kaba la dep shna naduh ki snem ba la dep ka dang sah ïngjah haduh mynta
U bah Sirian Wahlang sordar ka shnong Nongsohpian haba ïakren ban u nonthohkhubor u la ong ba naduh ba ka sorkar ka la pan jaka ban shna ïa katei ka ophis ka shnong kam shym la don kano kano ka jingpyneh hynrei ka la shah sngewbha da kaba khmih lynti ruh ba ka jingdon jong katei ka ophis kan ai jinmyntoi ym ïa ki samla kiba wan pyntbit ha kiba bun ki kam kum ki kam welding, wiriring,shna jingshna bad kiwei iwei hynrei kan long ruh ka jingmyntoi ïa ki nongshong shnong ha kiba bun ki bynta.
U bah Wahlang u la ong ruh ba ka jingiehnoh sah khlem pyntrei kam ïa katei ka ophis kam long kaba bha namar ka don ha kham kyndong na ka surok bad ka lah ban long pynban ka jaka rieh jong ki riew sniew ha ka por mynmiet.
U bah Wahlang u la ong ruh ba ka Industrial Training Institute ka dei kawei na ki shlem ai jinghikai kaba paka bha na ka bynta ki samla khamtam kito kiba dei ki khun jong ki long ïng baduk kiba la pule Class VIII haduh class X bad ki bym don lad shuh ban bteng ïa ka jingpule jong ki hynrei kiba don pat ka jingangdud ban pyntbit ha ki kam ba bun jait na ka bynta ban kyrshan ïa ka lawei ka jong ki bad ka ïng ka sem.
Utei u nongïalam shnong u la ong ruh ba man la u snem ka sorkar ka ju khot applikeshon ï ki samla kiba la pass class VIII shaneng ban leit shah pyntbit ha katei ka shlem ai jinghikai ha ryngkat ka bai bam kaba biang man la u bnai bad bun ki samla ki bym don lad shuh ban leit pule ki kwah eh ban leit shah pyntbit ha katei ka jaka ba la buh da ka sorkar namar ki ïoh bad ka bai bam hynrei haduh mynta imat ka sorkar ka shim sting pat ban pynbit pynbiang ïa katei ka tnad trei kam.Khatduh eh u la ong ba ka sorkar ka la dei ban plie noh bad pynbit pynbiang noh ïa baroh ki jingdon kam ha katei ka ophis khnang ba kan long ka jingmyntoi ïa ki samla kiba kwah ban pyntbit ha ibun jait ki kam lyngba kate ka tnad trei kam jong ka sorkar.
