Shillong, Jylliew 24 : U Myntri Rangbah ka jylla u Conrad K Sangma mynta ka sngi ula leit ïashim bynta ha ka jingïalang jong baroh ki seng saiñ pyrthei (All Party Meeting) kaba la khot da u Myntri Kam Pohïing ka Ri u Amit Shah ha kaba ïadei bad ka jingjia ka thma ïapher jaidbynriew ha ka jylla Manipur.
U Conrad Sangma uba long ruh u National President ka NPP ula ong, “Ha katei ka jingïalang baroh ki seng saiñ pyrthei kynthup ïa ka National Peoples Party (NPP) ki la pynpaw ïa ka jingsngewkhia ïa ka jingjia kaba jia mynta hapoh Manipur bad ngi la kyntu ïa ka Sorkar Pdeng ba dei ban shim khia ïa baroh ki lad ki lynti ban pynthikna ba ka jingsuk bad jingshngaiñ ka dei ban wan phai biang hapoh ka jylla Manipur”.
“Ngi la kyntu ïa ka Sorkar Pdeng ba ka dei ban pynthikna ba ka jingai jingïarap bad ki marbam mardih kaba ki paidbah ki donkam ka dei ban poi sha ki bad dei ban pynthikna ba ka jingsam ïa kitei ki jingïarap ka dei ban bun bad ka ban ïaid beit ïaid ryntih ha baroh ki jaka, khamtam ha ki Relief Camp ne ki jaka sah riehtngen kiba shipor kiba don ha katei ka jylla” ong u National President ka NPP.
Ula ong, ba ka seng ka la ban jur ban wanrah biang ïa ka shongsuk shongshngaiñ ha kaba ka Sorkar Jylla, Sorkar Pdeng bad baroh ki seng saiñ pyrthei ki dei ban poi sha ki paidbah bad ban kyntu ïa ki paidbah ban wanrah biang ïa ka shongsuk shongsaiñ ha Manipur bad ban poi sha ki seng bad ki kynhun niam bapher bad ban shim ïa ki sienjam khamtam haba ki niam bapher bapher ki la shah ktah jur bad bun ki jingtei ki jongki ki la shah pynjulor.
“Donkam ban pynthikna ba ki kynhun kieng atiar kiba donkti ha ka kam thombor bad kam ïa umsnam dei ban leh da kaba tyngeh da ka Sorkar Pdeng ban pynthikna ba kin ym ïoh lad ba kin ïaid shakhmat bad kino kino ki kam ïa umsnam bad dei ban tehlakam ïa ki bad ha kajuh ka por ka Sorkar Pdeng ka dei ruh ban shim ia ki sienjam ban ïoh ïa ka jingshaniah na ki paidbah ka Manipur kaba kynthup ïa ka jingleit jurip jong u Myntri Rangbah duh ka ri bad u Myntri Kam Pohïing ka ri bad kiwei kiwei ki nongïalam jong ki seng saiñ pyrthei ki dei ban leit sha Manipur bad ban kyntu ïa ki paidbah ba ki dei ban phai khmat sha ka jingsuk bad ban pynthikna ba sa shisien ka jylla Mnaipur kan shongsuk biang” ong u Conrad.
Ula ong ba ka NPP ka ai ruh ïa ka jingkular ban ai ka jingïatreilang ban leh ïa la ka bynta ban wanrah biang ïa ka jingsuk ha Manipur.
