Nongstoiñ, Ïaiong 5: U MLA jong ka Nongstoiñ, Bah Macmillan Byrsat hynne ka sngi la phah da ka jingthoh sha u Executive Engineer ka tnad PWD (Road) ba un bthah ïa u Contractor ba dei ban pyntrei ïa ka surok Nongstoiñ-Sohpian ba un bud ryntieh katkum ki jingbthah kiba don hapoh ka Detail Project Report.
U Bah Macmillan Byrsat hadien ba u la ïohi ha ki lad pathai khubor ïa ka jingkynthoh kaba jur da ki sengbhalang bad nongïalam shnong, kiba la ther tyngeh ïa ka jingbym shaniah ïa u contractor u ba pyntrei ïa ka surok Nongstoiñ Sohpian, da kaba ong ruh ba u la ot lypa shiphut tam na ka estimate kaba la don bad ka jingbym lah ban pyntrei katkum ka DPR.
Kumta na ka liang u MLA ha ka sngi nyngkong, u la thoh sha u Executive Engineer bad kyntu ïa u Executive Engineer ka tnad PWD ba un bthah ïa u Contractor ba un bud ryntieh katkum ka DPR, khnang ba kam don kano kano ka jingthut hadien habud ha ka por ba pyntrei ïa katei ka surok. Ha kajuh ka por u MLA u la kyntu ïa u Contractor ba un pyntrei bha katkum kaba la thoh ha ka DPR, khnang ba kan nym wit hadien habud.
U la ong ruh ba ki dkhot jong ki sordar shnong kumjuh ki nongïalam sengbhalang, ki la wan ban ïakynduh kyrpang ïa u halor katei ka bynta kaba la ktah ïa ki paitbah ka thaiñ.
Ha katei ka jingïakynduh bad ki sengbhalang kumjuh ki sordar shnong, la ïoh ban ïatai bha ha kaba ki nongïalam jong ki ar tylli ki sengbhalang kiba kynthup ïa ka KSU bad FKJGP ha ryngkat ki sordar shnong, ki la kren shai ba katei ka company kaba pyntrei ïa ka surok na Sohpian-Nongstoiñ kaba napoh ka chainage 73.500 haduh 80.424, kam shym la bud beit bud ryntieh ïa ka DPR kaba kynthup ban siang rong bad ban pynheh. Katkum ka DPR la lap shai kdar ba ka jingpyntrei ka kham rit ban ïa kaba don hapoh ka DPR.
