Kyntu u MLA ban khot kyrkieh ïa ka Cabinet ban ai ïa ki jingdawa ki FASTOM

Shillong, Naitung 3 : Mynta ka sngi hadien ba la wanphai na ka jingïaseng Sngi U Blei, u MLA ka Mawlai Constituency u bah Process T Sawkmie ryngkat bad u khun ki la leit jngoh ïa ki nonghikai hapoh ka lama Federation of All School Teachers of School Teachers of Meghalaya (FASTOM) bad haba u la ïohi ba ki dang bteng ïa ki jingïakhih shong kyllaiñ myngngor jongki u la dap ka mynsiem bad sngewkhia haduh katta katta ba kiba pli ki hap ban thiah ha surok ban ïakhih wat ha ka Sngi U Blei ruh kim ïoh shuh ban kiew sha ki jaka mane Blei. Kumta halor kane ula kyntu jur ïa ka sorkar ba ka dei ban khot kyrkieh noh ïa ka jingïakynduh ka Kynhun Myntri (Cabinet) ban ïakren bad ai noh ïaki mat jingdawa jong ki nonghikai khnang ba kin suk ka mynsiem ban leit phai noh sha la ïing bad sha la ki skul ban hikai ïa ki khynnah skul kumba ju long man la ka sngi.
U la ong “ Nga dap bad sngewkhia ka mynsiem haba nga ïohi ba ki hap ban ïakhih wat ha ka Sngi U Blei ban ïoh ïa ki hok jongki. Kumta nga da kyntu jur ïaka sorkar ban khot noh kloi ïaka jingïakynduh ka Kynhun Myntri (Cabinet) ban ïakren noh halor kane ka kam khnang ba kin hun ka mynsiem ban leit phai sha la ki ïing ki sem, ki khun ki kti bad kumjuh ruh sha ki skul ban ïoh ai jinghikai ïa ki khynnah skul”.
U la ong lada ka sorkar ka mon ka lah ban khot shisngi shisngi ïa ka Kynhun Myntri namar kat haduh mynta ka sorkar ka la dei ban dep pynkhreh lut nadong shadong ïa ki kot ki sla bad jingkheiñ jingdiah kumba la dep kular ruh da u Symbud Myntri Rangbah u bah Prestone Tynsong ïa ki nonghikai.
Shuh shuh u bah Process u la ong “Ka jylla Meghalaya ka la dap 50 snem mynta bad ngi dang rakhe ruh ïa kata ka jingdap 50 snem jongka, hynrei haba phai pat sha ki jingeh ba ki paidbah ki ia kynhun la ïohi ba kawei hadien kawei ka jingeh kam kut satia. Kane ka pynpaw ba ym don shuh ki nongïalam kiba tbit ban ïalam ïa ka synshar khadar. Kumta ki paidbah ki la dei ban kyndit bynriew noh bad wanrah noh da ka sorkar kaba don ka jingïohi jngai ha u 2023 namar sa tang katto katne por ki paidbah ki la ïoh ban shim ïa ka rai ha ki kti la jong. Ym dei ba nga kren pynshit ne kren politik hynrei nga kren halor ki jingshisha ïa kiba ki paidbah ruh ki la ïohi bad mad da lade hi”.