Shillong, Nailar 20 : U MDC ka Laban-Mawprem, Bah Ricky Shullai ha ka sngi Balang u la kyntu ïa u Myntri ka tnad Tourism ka sorkar Jylla, Bah Paul Lyngdoh ban pynlong ïa ka jingleit jurip lang ryngkat ki nongïalam shnong kumjuh ki nongmihkhmat ka thaiñ ïa ka jaka kaba thmu ban tei bad pynieng ïa ka Ropeway Project ha u Lum Shyllong.
Ha kane ka jingleit ïa kynduh u MDC u la ïathuh ba ka jingleit kynduh jong u ïa u Myntri kadei halor ka jingujor kaba mih na ki paidbah kiba pynpaw ïa ka jingsngew jong ki halor ka jingpynngat ïa ki dieng.
“Watla kane ka projek ka ïoh ïa ka jingkyrshan jong ki paidbah ba bun hynrei ka jingpynkhyllem ïa ki dieng ka la dei kawei ka mat kaba kiba bun ki pynpaw ka jingsngewkhia ïa ka jingshah ktah ka mariang,” u la ong.
Nangta u ong ruh ba na ka liang ki paidbah ka thain ki pdiang sngewbha ïa katei ka projek da ka jingkyrmen ba kan wanrah ïa ka jingkylla ïa ka kamai kajih jong ki nongshong shnong khamtam ïa ki samla ha kane ka juk mynta. Hynrei u bynrap pat ba kane ka jingkwah ban don ka jingjurip lang ka long kum shi bynta ruh ban wallam ïa ka rukom treikam kaba shai bad kaban ïahun lang da baroh.
Ha kane kajuh ka sngi, u MDC u la ai ruh da ka dorkhas sha u Myntri uba bat ruh ïa ka tnad Textiles ban kyrpad ba un ai jaka na ka bynta ban buh ïa ka Fire Service Station ha Mulberry Seed Production Centre kaba don ha Lawsohtun.
U MDC u ong ba ka jingdon jong kane ka Station kan ïarap ruh haba don ki jingjia ba kyrkieh nalor ba ka don ruh hajan bad katei ka ropeway project.
