Kyntu u ma Pala ïa ka sorkar ban pynkylla ïa ka MMDR Act ban ïoh tih dewïong liew khnai

Shillong, Rymphang 12 : U Nongïalam ka Congress bad MP ba rim ka jylla u Ma Vincent H Pala u la kyntu ïa ka sorkar ban wanrah ka jingpynkylla ïa ka Mines and Minerals (Development and Regulation ) Act (MMDR Act) khnang ba yn lah ban weng noh ïa ka jingkhang tih dewiong liew khnai ha ka jylla bad lyngba kane kan pynduh jait ïa kine ki kam beaiñ ruh.
“ Nga sngew ba kam long kaba eh ïa ka sorkar ban wanrah jingpynkylla ïa ka MMDR Act ong u ma Pala haba ïakren” bad ki nongthoh khubor.
U la ong “Ka BJP bad ka NPP ki la mynjur hynrei tang da ka ktien khlem ka kam. Kine ki jingjia ki jia kumne namar ki briew ki trei da ka jingsheptieng”.
U la ong lada wanrah ki jingpynkylla bad ithuh ïa kane ka jingtih dewiong kiba kum kine ki jingjia ruh kin ym jia thala.
“ Shwa ban shah khang ka jingtih dewiong ki briew ki la trei ïa kane ka kam da ki snem lynter bad ym pat ju jia koit kum kine ki jingjia. Hynrei lada ki briew ki trei ha ka jngsheptieng ki jingjia aksiden kiba kum kine ki lah ban jia. Hynrei lada ailad ba kin trei da ka mon lajong kin ym jia kum kine ki jingjia ruh” ong u Ma Pala.
U la ong ka ïing bishar Supreme Court ka la dep rai ba u mar poh khyndew uba shapoh khyndew u dei u mar jong ki trai jaka kiba bun ki dei ki riewlum trai ri.
“ Kumta u la ong ba ka sorkar ka dei ban wanrah ka jingpynkylla ha ka MMDR Act ban pyllait ïa ki briew ka jylla na ki jigkhang tih dewiong bad dei ruh ban ailad ïa ki paidbah ba kin bteng ïa kane ka kam tih dewiong liewkhnai da kaba ki bud ryntih ïa ki kyndon aiñ bad kumno ban ïada ïa ka mariang ruh” ong biang u ma Pala
U la kynnoh ba ki don ki riew shim kabu ha lyndet jong ka jingbym treikam ka sorkar. U la ong “Lada ki briew ha Secretariat ki wanrah jingpynkylla ïa ka MMDR Act kin sa duh noh ïa ka commission jongki”.
U la ong lada ka sorkar ka don kata ka mon lade ïa ka MMDR Act lah beit ban pynkylla. U la ong ruh ba donkam ban wanrah ïa ka polisi kaba shai kdar halor ka kam tih dewiong da kaba ailad ban bteng ka jingtih dewiong tangba ryngkat ki jingïada ïa ka mariang.
Ki don ki kor ki bor (techology) kiba ïada ïa ka tdem bad pum pum ka sorkar ka donkam tang ban shim khia. Halor ka jingduk jingkyrduh jong ki briew sha nongkyndong u la ong ban shu kam ba ka jylla ka la kiew ha ka ïoh ka kot ka long ka bym shisha namar ha ka jingshisha hi kane kam paw satia kumta. Ki briew ki dang im duk beit khamtam sha thaiñ nongkyndong. Ka sorkar ka lah ban kam ba ka ïoh ka kot jongka jylla ka la kiew hynrei ha ka jingshisha hi kam long stia kumta.