Khliehriat Iaïong 02: Ha ka jingialang jied nongkit kam jong ka party National People’s Party ba la pyn long mynta ka sngi ha Ladrymbai Dongwah, u MLA ba rim jong ka thaiñ, u ma Nehlang Lyngdoh uba long ruh kum u President NPP 6- Khliehriat Block Committee ba dang shu hied shen mynta, u la kyntu bad iawer lang ïa baroh ki nongkitkam, ki dkhot ban ïa treilang ban kyntiew ïa ka party.
Ha kajuh ka por, u ma Nehlang Lyngdoh, u kyntu ruh ïa ki paidbah ka thaiñ ba kin ai ka jingkyrshan ba pura ban jied biang ïa u sa shi sien pat kum u nongmih khmat jong ka thaiñ u ban sa iakhun ha kane ka MLA Election ka ban sa long ha u snem 2023 bad un iakhun na ka 6-Khliehriat Constituency “Lada kam don ka jingiatreilang bad ka jingiatylli kano kano ka party ruh kan nym lah ban poi sha ka thong ha kano kano ka kam ruh, kumta donkam eh ban ïa tylli bad ban ïa treilang” pynpaw u ma Nehlang Lyngdoh.
Haba kren ha ka jingialang, u wei na ki riew rangbah, u ma L. Ngamlai u la ong ba baroh kine kiba la shah jieh ban long ki nongialam, ki nongkitkam bad kumjuh ruh ki Dkhot jong ka NPP 6- Khliehriat Block Committee, ki dei ki briew kiba don ka jingshem phang ha ka liang ka kam synshar khaddar, u la ong kum u ma J.R. Pyrtuh bad u ma Nehlang Lyngdoh ki dei ki briew kiba la tbit ha ka kam synshar ne ka kam saiñ hima sima.
Ki nongialam bad ki dkhot jong ka NPP 6-Khliehriat Block Committee kiba la jied ki kynthup u President, u ma Nehlang Lyngdoh,Vice President, u MDC barim jong ka Bataw, u ma Joinriwell Pyrtuh, General Secretary, u ma Iasyllokki Lyngdoh bad u ma Kevin Dkhar bad ia ki dkhot jong ka Executive Committee yn sa jie pat haiden katto katne por.
Ia ka jingialang la pyniaid da u President NPP, East Jaiñtia Hills District u Dr. J.W. Dkhar, ha ka jingiadon ryngkat lang u MDC ka thaiñ, u bah Phasmon Dkhar, u ma Lalminga Nngamlai, uba dei u President National People Youth Front (NPYF), u ma Grimlang Dkhar, Secretary NPYF, u ma Dametreyo Rymbai bad kiwei ki riew rangbah kynthup ki longkmie bad ki longkpa jong ka thaiñ.
