Nongpoh, Nailur 26: Kum shibynta ka Swasth Nari Parivar Abhiyan kaba dei ruh ka thong jong u Myntri Rangbah duh ka ri, u Narendra Modi ban pynthikna ba ka koit ka khiah khamtam ïa ki longkmie ba ar met bad ki khynnah kan long kaba paka, u Lat ka jylla u CH Vijayashankar mynta ka sngi u la leit ban iuhkjat bad ban leit jngoh ïa ka Umiam Dispensary ha Ri-Bhoi District ban ïakren ruh bad ki longkmie ba armet, ki nongtrei ka koit ka khiah lem bad ki paidbah nongshong shnong.
Ha kane ka prokram la sakhi ruh da ka jingdonlang u Abhilash Baranwal Deputy Commissioner ka Ri-Bhoi District, ka Dr NE Kharsahnoh Director of Health Services (MCH&FW), Raja Brahma ADC ka Ri-Bhoi, ka Dr AR Marak DMHO, ki ASHA ki nongtrei ka koit ka khiah bad kiwei kiwei lem bad ki paidbah nongshong shnong.
Ha katei ka sngi la sam ruh ïa ki soh bad ki jingbam tei met sha ki longkmie ba armet, ki jingsop poi bnai sha ki khun samla kynthei, kum ka jingpynkup bor ïa ki longkmie bad ki khun kynthei.
Ha ka jingkren jong u, u Lat ka jylla u Vijayshankar u la pynpaw ïa ka jingdonkam jong ka koit ka khiah bad kane ka jingthmu, da kaba pynshlur ïa ki nongshong shnong ban pyndonkam pura ïa ki jingshakri ha ka koit ka khiah ba la ai hapoh kane ka prokram.
U la ban jur ba ka jingïalap lyngba kane ka prokram ka dei ka sienjam kaba kongsan da ka Sorkar India ban kyntiew ïa ka koit ka khiah bad ka jingbha jingmiat jong ki kynthei, ki khynnah, bad ki longïing lyngba ki jingsumar khlem jingsiew.
Ïa kane ka prokram la sdang ha baroh kawei ka ri, ka Swasth Nari Sashakt Parivar Abhiyan ka thmu ban pynkhlaiñ ïa ka jingai jingsumar lyngba ka jingïatreilang bad ki paidbah, ka jinglap kloi ïa ki jingpang, ka khuid ka suba ryngkat ki jingbam tei met, khamtam ïa ki kynthei bad ki khynnah.
