Shillong, Rymphang 19 : U Nongïalam ka Liang Pyrshah u Dr Mukul Sangma u la kyntu ïa u Lamphang ka ïing Dorbar Thawaiñ u Thomas A Sangma ban weng noh na ka jingbuh jingthoh ïa ki katto katne ki kyntien kiba la ïakren ha ka kynta kylli jingkylli ha ka 18 tarik Rymphang khamtam ïa ka kyntien kaba u Myntri Rangbah ka jylla u Conrad K Sangma u la kren pyrshah ïa u da kaba ong beit “ Wat tuklar” namar u ong kane ka long ka jingpynkheiñ ïa ki kyndon pynaïaid ïing dorbar ha ka jingshisha u dei ban kyntu ïa u Lamphang ban ong wat pynwit ne ap ïa ka jubab ym ban kren beit ïa u kum u dkhot ka ïing dorbar.
Haba wanrah ïa kane hapoh ka ïing dorbar u Dr Mukul u la ong ba kane ka rukom leh ka pynpaw ba ym don jingburom shuh ïa ki kyndon pynïaid ïing dorbar .
“ La jan man ba ïashong dorbar nga la ïohi ba ki don ki para dkhot kiba pynpaw ba kim burom shuh ïa ki rukom pynïaid ïing dorbar” ong u Dr Mukul.
“ Ha ka kynta kylli jingkylli ha ka 18 tarik u Myntri Rangbah u la dei ban phai sha u Lamphang hynrei u la kren pyrshah pynban ïa nga “ wat ym tuklar kane ka dei ka jingpynkheiñ ïa ki kyndon. Man la uwei pa uwei u dkhot bad wat ki myntri haba ki jubab ki dei ban phai bad kren sha u Lamphang ym dei sha u para dkhot. Hynrei ka jia barobor ba ki myntri ki phai beit sha ki para dkhot haba ki kren ne jubab bad kane ka long ka jingpynkheiñ ïa ki kyndon jongka ïing dorbar”.
“ Kumta ïa baroh ki kyntien kiba u Myntri Rangbah u kren beit sha nga kim dei ban don ha ki jingthoh ne record, Nga kyntu ïa kane lyngba jongphi Lamphang ba phin pdiang bad shim khia ïa kane. Nga dei uwei na ki dkhot ba la rim bha hapoh ka ïing dorbar uba la shah jied la hynniew sien lynter. Kumta ngi dei ban pynthikna ba ïa kino kino ki jingïakren ne ïatai hapoh ka ïing dorbar ki dei ban long kat kum ki kyndon ba la thaw khnang ba ka burom bad iktiar jong ka ïing dorbar kan ïaineh beit” ong u Dr Mukul.
Na ka liang u Lamphang u la ong ba un bishar bniah ïa kane. Hynrei ha kajuh ka por u Myntri Rangbah ruh u la pdiang ïa kane ka jingai jigmut da kaba ong “ Kum u Nongïalam jongka ïing Dorbar nga mynjur ïa kane ka jingai jingmut u Nongïalam ka Liang Pyrshah. Namar ki kyndon aiñ ïing Dorbar ki dei ban treikam ïa baroh ki dkhot bad ka dei ka rukom ba ngin ïaid kat kum ki kyndon. U dei u dkhot uba la rim bha bad kane kan long kum ka jinghikai ïa nga. Kumta kaei kaei ka rai kaba phin shim kum u Lamphang ka dei ban long beit kat kum ki kyndon pynïaid ïing dorbar bad nga pdiang bad mynjur ïa kane”.
