Kyntu u Deputy Commissioner ïa ki tnad Sorkar ban pynphriang halor ka jingdonkam ban tip ïa ki aiñ jingïada ïa ki khynnah bad riew kynthei
Nongstoiñ, Naiwieng, 24: Ka District Administration ha ryngkat ka jingïatreilang jong ka District Social Welfare Officer, District Child Protection Officer bad One Stop Centre, Nongstoiñ, ki la pynlong ïa ka ‘sensitization programme of Public and Media on various provisions of law on Crime Against Women, Children and POCSO Act’ mynta ka sngi ha Trysem Hall DC office.
Ka jingthmu jong kane ka prokram ka long ban ai jingtip sha ki paidbah ïa ka jingdon jong ki aiñ bad ki kyndon lada don ki jingshah thom bor. Ha kane ka programme la wan ïa shim bynta da u bah Garod LSN Dykes IAS Deputy Commissioner ka West Khasi Hills District kum u kongsan, u ADC bah HK Thabah MCS, kong VC War DSWO, DCPO bah W.Shabong, kong BL Marshillong Centre Manager One Stop Centre Nongstoiñ, kong AD Wanniang District Legal Services Authority Nongstoiñ, ki Ophisar bad ki nongtrei na ki tnad sorkar, ki sordar, ki sengbhalang nalor kiwei pat.
Haba ai jingkren kum u kongsan u bah Garod LSN Dykes, u la ong ba kane ka phang jong ka programme ka long kaba donkam haduh katta katta, ha kaba ka Sorkar ka la shimkhia bha bad ka la thaw ruh ïa ka committee kaba la tip kum ka Women Empowerment Assembly Committee, ban peit halor ka jingshah thombor bad jingshah ban beiñ jong ki kynthei bad khynnah.
U la kyntu ïa baroh kiba la wan ban ïa shim bynta, ban pynphriang ïa ka khubor sha ki paidbah shaphang ka jingdon jong ki aiñ bad ki kyndon, ban ïada khamtam sha ki shnong nongkyndong ïa ka jingdon jong kine ki aiñ, ban ïada lada jia kano kano ka jingshah thombor bad shah ban beiñ.
U la ai jingmut ruh ba ki awareness programme kin kham myntoi shuh shuh lada ki tnad sorkar, kin long noh hapoh kawei ka shatri ban pynphriang ïa ka khubor sha ki nongshong shnong. U la pynkut ïa ka jingkren da kaba pynshlur ban wan shakhmat khlem ka jingtieng ban ïoh ïa ki jingïarap na ki pulit, ki kashari ne na ki tnad Sorkar lada wan ka jingshah ban beiñ ne shah thombor.
Kiwei kiba la ai jingkren ki long kong VC War, ba la pynïaid ïa ka programme, bah HK Thabah u ba la ai ïa ka jingkren pdiang, kong BL Marshillong ba la ai jingkren halor ka domestic violence, bah W Shabong ïa ka child rights and protection, kong AD Wannïang shaphang ka POCSO Acts, kong DP Nongbri ïa ka domestic violence acts bad bah B kurbah u ba la ai ïa ka jingkren khublei.