Mairang, Nailur, 18: U Deputy Commissioner (Supply) ka Eastern West Khasi Hills District Mairang, u pyntip paidbah ba ka appointment jong ki nongsam khaw rashon kiba don hapoh ka District kan kut noh ha ka 31 tarik u bnai Nohprah 2022. Kumta la khot aplikeshon ban pynthymmai ïa ki nongsam khaw rashon hapoh ka Eastern West Khasi Hills District na ka bynta san snem, kata, naduh u snem 2023 haduh u snem 2027.
Ïa ki aplikeshon lah ban ïoh na ka ophis U Deputy Commissioner, Eastern West Khasi Hills District, Mairang naduh ka 20 tarik u bnai Nailar 2022 ha ki por long trei. Tangba kino kino kiba kwah ban aplai kin hap ban bud katkum kine ki kyndon ba la buh.
Ki nong aplai ki donkam ban thep ïa ka Security Deposit kaba long San Hajar tyngka (5000/-). Kiba aplai ki dei ban long kiba nang ban thoh ban tar. Ym shah ïa ki Sordar, Secretary shnong bad ki dkhot ka Executive Committee jong ka shnong ban long kum ki nongsam rashon
Ha ka aplikeshon ba la dep pyndap dei ban suhlang ïa 2 tylli ki dur passport size, ki Xerox copy jong ka Scheduled Tribe, EPIC, Marriage Certificate, Aadhaar Card, Pan Card, Bank Passbook, Residen-tial Certificate ha ryngkat ka Court Fee Stamp kaba arphew san tyngka. Dei ban suhlang ïa ka rai jong ka Dorbar Shnong bala jied thymmai ïa ki dealer lane la pynskhem (Renew) ïa U/Ka dealer barim
Dei ban suhlang ïa ki kyrteng ki dkhot jong ka V.C.A.C ym duna ïa ka 8 (phra) ngut kynthup lang ïa u Chairman, Secretary, ki dkhot kiba kynthup ïa ki president Seng Kynthei bad Seng Samla, dkhot Self Help Group bad 6 (hynriew) ngut ki nongïoh khaw kiba don rashon card (PHH lane AAY)
Lada jia ba ym lah ban jied thymmai ne pynskhem ïa U/Ka dealer hapoh ka tarik ba la buh, ïa ka bhah mar rashon yn ai noh ha kino kino ki centre kiba marjan khnang ba ki paidbah kin ym duh ïa ki mar rashon
Ki nongsam rashon ba shah jied thymmai ki dei ban pynbiang ïa ka electronic weighing scale ba la pynshisha da ka Metrological Department. Ki nongsam rashon kiba dang bat ïa ka kam sam rashon mynta ki dei ban suhlang ïa ka certificate kaba ïadei bad ka jingthew jingwoh na u Inspector, Metrological Department, Nongstoiñ bad ki dei ruh ban suh lang ïa ka certificate na ka Office jong u Food Safety Officer, Nongstoiñ.
Baroh ki nongsam khaw ki dei ban don ïa u Aadhaar Number. Lada don, yn kham pyrkhat ïa ki Self- Help Group bad ïa kino kino ki seng ïa kiba la lamkhmat da ki riew kynthei. Ïa ki aplikeshon dei ban pynpoi sha ka ophis u Deputy Commissioner ka Eastern West Khasi Hills District ha lane shwa ka 20 tarik u bnai Risaw 2022.
