Khliehriat jylliew 22: U Deputy Commissioner ka East Jaiñtia Hills District, u Abhilash Banarwal, IAS, ha ka hukum ba la pynmih hynnin ka sngi, u la kyntu jur ïa ki paidbah, kito ki ba ïaid lyngba na ka surok national highway na ka thaiñ Narpuh East Jaiñtia Hills District ba ki dei ban da long phikir bad peitngor bha namar ka jinghap u slap ka lah ban wanrah biang ïa ka jingtwa ka khyndew, ka jingtwa ki lum, ki maw.
La bthah ruh ba lada don kano kano ka jingtwa, jinghap khyndew, ki dei ban pyntip mar mar sha ki bor synshar district, sha ki tnat pulit kiba don hajan bad sha ki Block Development Officer bad ha kajuh ka por khnang ban nym wanrah jingma ïa ka jingim, la kyntu jur ïa ki paidbah ba kim dei ban leit tur klumar sha ki jaka ba don ki um kiba tuid ar sut, sha kito ki jaka ba shlei bad ba dap um bad sha ki jaka ba long them.
Katkum ka hukum, la bthah ruh ba ki tnat treikam jong ka sorkar, kum ka tnat pulit, ka Public Works Department, ka tnat bor ding, MeECL, ka Water Resources, ki ophis jong ki Block Development Officer, ka tnat ka koit ka khiah (Health), Civil Defence, Fire and emergency, NHAI, ki karkhana dewbilat bad kiwei kiwei ba ki dei ban long peitngor bad long ba la khreh ban pynbit pynbiang ïa ki jingdonkam lada donkam ha kano kano ka por.
