New Delhi, Nailar 10: U Myntri Sorkar Pdeng ba dei khmih ïa ka Tnad ka rep ka riang, ka bha ka miat jong ki nongrep, bad ka roi ka par ki jaka nongkyndong, u Shivraj Singh Chouhan, sa shisien u la pynpaw biang ïa ka jingkyrpad jong u Myntri Rangbahduh ka ri da kaba kyntu ïa ki nongshong shnong ban thied ïa ki mar ba la shna hapoh ka ri. U Myntri Rangbahduh ka ri, u Narendra Modi, ha ka 2 tarik Nailar, 2025 ha ka por ba la ai ïa ka bhah kaba 20 jong ka PM-Kisan Samman Nidhi ha Varanasi, u la kyntu ïa ki briew ka ri ba kin thied ïa ki mar ba shna hi hapoh ri.
Haba pynskhem biang ïa ka jingkut jingmut jong ka sorkar ban pynkhlaiñ ïa ka ïoh ka kot, u Myntri Sorkar pdeng ba dei khmih ïa ka Tnad ka rep ka riang u la pynkynmaw biang ïa ka jingkyrpad jong u Myntri Rangbahduh mynta ka sngi bad lyngba ka jingpynbna, u la ong: “Kopara kynthei bad shynrang ba ieit-ki khun pyrsa kynthei bad shynrang, baroh ki im na ka bynta lade-ki khniang, ki sim, bad ki mrad. Hynrei kaei ka jingmyntoi ban im tang na ka bynta lade? Ngi dei ban im na ka bynta ka ri ka jong ngi. Ka jingim na ka bynta ka ri kadei kaei kaba u Myntri Rangbahduh ba donburom u la hikai ha kaba ïadei bad kane. U la kyrpad ïa ngi ban thied tang ïa kito ki mar na ka bynta ki ïing ba la shna hi hapoh ka ri.
Para kynthei bad shynrang baieit, la kaei kaei kaba la shna ha shnong jong phi, ha nongbah ba marjan, ha distrik jong phi, ha ka jylla jong phi, lane ha kano kano ka jaka ha ka ri jong ngi- thied tang ïa kita ki tiar. Ka ïoh ka kot jong ka ri ka kiew stet bha. Mynta, ngi don ha ka kyrdan kaba saw ha ka pyrthei, bad shen, ngin sa poi sha ka kyrdan kaba lai. Bad kane ka ri kaba don 1.44 billion ngut ki briew ka dei ka ïew kaba heh bha. Lada ngi kut jingmut ban thied bad pyndonkam tang ïa kiei kiei kiba la shna ha ka ri jong ngi, te ki nongrep jong ngi, ki nongpynmih mar barit baria jong ngi, ki self help group, bad ki nongtrei kti ha ka ri – baroh kin sakhi ba ka ïoh ka kot jong ki kan kiew. Bad ynda ka jingkamai jong ki ka la kiew, ka ïoh ka kot jong ngi kan nang khlaiñ.
Balei ka pisa jong ngi kan leit shabar ri? Ai ba kan pynbiang ka kamai kajih ïa ki khun ki kti jong ngi hi. Ngan im na ka bynta ka ri jong nga, bad phi ruh phi dei ban im na ka bynta ka ri, kaba mut, thied tang ïa ki mar kiba la shna ha India.
