Delhi, Jymmang, 14: Ka Election Commission of India mynta ka sngi ka la pynlong ïa ka jingïalang bad ki Chief Electoral Officer jong baroh ki Jylla/UT ha New Delhi. La pynlong ïa kane ka jingïalang kaba ar sngi ban ïasam ïa ki jingshem bad ki jingtip na ki elekshon sha ki iing dorbar thawain jong san tylli ki jylla kiba dang shu kut shen ryngkat bad ki jingïaphylliew jingmut halor ka jingpynkhreh ban pynlong elekshon, ka jingpeitngor ïa ki jinglut jingsep, ka electoral roll, ki IT application, ka jingpeit ïa ki jingtip, EVM/VVPAT, ka jingweng ha ka por ïa ki jingeh, ka rukom treikam SVEEP & ka jingai jingtip sha ki nongthep vote, ki nongthoh khubor bad ki jingai jingtip.
Ha ka jingai jingkren, u CEC Sushil Chandra u la ong ba kum kine ki jingïalang kilong ka rynsan kaba biang bha ban ïasam ïa ki jingshem bad ki jingtip iwei na iwei. Haba ai jingïaraoh ïa ki Chief Electoral Officer, u la bynrap ba ki elekshon ba la pynlong ha san tylli ki jylla kidei kiba la pynlong hapdeng ka khlam kilong kiba jop bad kim shym la don kum kine mynshuwa kiba lah ban twad jingmut. Ki jinglong jingman kiba phylla ki dawa ïa ki lad kiba phylla na ka jingkhang ïa ki jingïaid paidbah, ka jingkyntiew ïa ki jingïalap lyngba ki lad digital bad ka jingpeitngor shisien taiew ïa ka jinglong jingman ryngkat bad kito kiba don bynta ha kane.
U CEC Chandra u la ban halor ka jingdonkam ban bteng ka jingkyntiew ïa ki kam ai jingshakri na ka bynta ki nongthep vote lyngba ka kam elekshon baroh kawei, naduh ka jingpynrung kyrteng haduh ka jingthep vote. Haba batai bniah, u la kdew ba ki CEO kilong kiba mihkhmat ïa ka Election Commission of India ha ki Jylla bad dei ban pynthikna ba ki briew ki lah ban ïakynduh ïa ki. Haba batai ïa ki jinglong jingman, u la kyntu ïa ki CEO ban phah ïa ki jingai jingmut jong ki man ka por sha ka ECI na ka bynta ka jingpynbha shuh shuh bad ka jingkyntiew ïa ka jingpynsuk ïa ki kam ba ki nongthep vote ki hap pyndep. U la kyntu ïa ki CEO ban pynkhlain ïa ka jingtreikam jong ki bad ban pyni ïa ki rukom treikam ba paka jong ki bad ki jingsaindur ba thymmai ban pynïaid ïa ki kam elekshon sha ka pyrthei baroh kawei.
U CEC u la ai khublei ïa u EC, Rajiv Kumar uba la shah jied kum u Chief Election Commissioner ba thymmai. U Kyrmen ba ka ECI kan kot sha ki kyrdan ba kham shalor hapoh ka jingïalam jong u.
U Election Commissioner bad Chief Election Commissioner designate Rajiv Kumar haba ïakren bad ki Chief Electoral Officer u la ong kumba ka kamram ba la thoh shai ha ka Riti Synshar, ka ECI ka la wanrah ïa ki rukom treikam kiba khlain bad ki rukom ban pynthikna ba ka jingpynlong ïa ki elekshon kadei ban long kaba laitluid, kaba shai, kaba ki briew ki lah ban ïashim bynta na ka bynta man u nongthep vote. Lyngba ka pateng jong ki hynniew phew snem ba la leit, ka ECI ka la wanrah ïa ki rukom treikam na ka bynta kiwei kiwei ki ri synshar paidbah. U la kren ruh shaphang ki jingshem jong u haba pynlong ïa ki elekshon ha ki por ka khlam ha Bihar bad ki elekshon ha 5 tylli ki jylla dang shen. U la ong ba kane ka la dap da ki jingeh bad ki jinghikai thymmai. U la ong ba ki jinglong jingman bym pat ju ïohi ki la wanrah ïa ka jingdonkam ïa ki rai kiba pher kiba pynbeit lypa ïa ki jingbatai kiba bakla. U la kyntu ïa ki CEO ba kin rah shakhmat ïa ki jingpynkylla ba la wanrah hapoh ka por jong u Chandra khnang ban pynïaid ryntih shuh shuh ïa ki kam elekshon.
Ha ka jingkren jong u, u Kumar u la ong ba ka la don ka jingpyndonkam bha ïa ka teknoloji ban pynïar ïa ka jingïoh shim bynta bad ka jingshai ha ki kam elekshon. Ka ECI ka la pynïaid ryntih ïa baroh kawei ka kam IT da kaba peit thuh ïa lai tyii ki thup ba kongsan kiba long ki nongthep vote, ki kynhun sain pyrthei bad kito kiba pynïaid ïa ki kam elekshon. U la kyntu ïa ki CEO ba kin pynkhlain ïa ki kam IT kaba kynthup ïa ka jingai jinghikai ïa kito kiba trei ha kine ki kam khnang ba kin lah ban pdiang ïa ki jingkylla katkum ka juk mynta.
U Election Commissioner, u Anup Chandra Pandey u la kdew sha ka kamram jong ki CEO ha kine ki bnai ban wan kiba kynthup ïa ka jingpynbiang ïa ki jingdonkam ha ki jylla na ka bynta ka elekshon sha ka ophis u President ka India. U la ong ba ki CEO ki dei ban pyndonkam ïa kane ka por mynta ban pynkhlain bad kyntiew ïa ki bynta ba kongsan jong ki kam elekshon kiba kynthup ïa ka jingpynthymmai ïa ki electoral roll, ka jingkyntiew ïa ki jingdon jingem ha ki polling station, ka jingbuh bad jingpeit ïa ki EVM-VVPAT bad ka jingai jinghikai ïa ki ophisar. U la kyntu ruh ïa ki CEO ba kin pyntreikam ïa ki rukom treikam SVEEP khnang ban don ka jingïadei kaba kham jan bad ki nongthep vote.
U Pandey u la ai jingïaroh ïa CEC, u Sushil Chandra uba la ïalam lynti ha ka jingpynlong ïa ki elekshon sha ka iing sorbar thawain ha ki por jong ka jingeh hapdeng ka khlam bad u la ong ba ka jingpynlong elekshon ha India ha kane ka por jong ka khlam ka dei ba kiwei kiwei ki ri ki la ïaroh bha.
U Secretary General, u Umesh Sinha u la ong ba kane ka jingïalang ka dei ka rynsan ïa ki baroh ba kin peit ïa ki jingshem jong ki bad ba kin pdiang ïa ki jingshem ba thymmai. U la ong ba ki elekshon ba dang shen ha ka por jong ka khlam ki la wanrah ïa ka jingkylla kaba khraw ha ka rukom pynlong elekshon ha kylleng ka pyrthei namar ki kamram kiba ïadei bad ka COVID-19 ki la long mynta shi bynta jong ka rukom treikam.
Ha kane ka jingïalang, ka Commission mynta ka sngi ka la pyllait ïa ka kot ‘My Vote Matters’ kaba mynta. Kane ka kot kaba mih saw sien shi snem ka don ïa ki jingthoh shaphang ki sienjam bad ki jingpyrshang jong ki 5 tylli ki jylla ba la pynlong elekshon ha u 2022 bad ki khana shaphang ki elekshon. E link: https://eci.gov.in/files/file/14171-my-vote-matters-vol-iii-issue-2/
Ka Commission ka la pynlait ruh ïa ka Election Statistics pocket book. Ki jingtip ba don ha kane ka kot ki dei kiba sngewtynnad bha ban pule shaphang ki kam elekshon ha ka ri naduh u 2017 haduh u 2021. Ka don ïa ki mat ba kongsan jong baroh ki elekshon bad ki elekshon sha ka Rajya Sabha bad ki Legislative Council ba la long ha kine ki snem. Ka Election Statistics Pocket Book ka dei ka kot ba ka Election Commission ka ju pynmih na ka por sha ka por naduh u snem 2014 kaba ai ïa ki jingtip shaphang ki elekshon ha India ha ka rukom thoh kaba suk ban pule.
Ha ryngkat ka ‘My Vote Matters’ bad ka Election Statistics pocket book, ka Commission ka la pyllait ruh ïa ka jingshon biang jong ki kaiphod shaphang ki elekshon kiba ar haduh hynniew kiba la long hapdeng u snem 1957 bad 1977. Kane ka dei ka kaiphod kaba pura kaba pyni ïa baroh ki jingtrei shitom ka Commission ban pynthikna ba ki elekshon ki ïaid hok, ki long kiba ryntih bad ki dei kiba baroh ki lah ban ïashim bynta.
Ki CEO jong baroh ki 5 tylli ki jylla ba la pynlong elekshon ki la ai jingtip shaphang ki jingshem jong ki bad ki rukom treikam ba thymmai ba ki la pdiang ha kine ki elekshon ba la long dang shen.
Ha kane ka jingïalang, la ïashim bynta da ki Chief Electoral Officer na baroh ki jylla / UT, ki Senior DEC, ki DEC, ki DG bad kiwei kiwei ki ophisar kiba la long heh na ka Commission. Ha ka sngi kaba ar, kan sa don sa kawei ka jingïamir jingmut halor ka Systematic Voters’ Education and Electoral Participation (SVEEP) ha ryngkat ka jingleit sha ka Integrated Election Complex ba dang shu plié dang shen ha Bakhtawarpur.
