Kyntu u Bah Prestone ïa ka AITC bad Congress ban mudui sha Ïingkashari

Shillong, Jymmang 30: U Symbud Myntri Rangbah ka Jylla Bah Prestone Tynsong hynne ka sngi nyngkong, ula kyntu ïa ka All India Congress Committee (AITC) bad ïa ka Indian National Congress ba kin leit mudui sha ka Ïing kashari halor ka jingkynnoh ba ka Sorkar Meghalaya Democratic Alliance (MDA) ba ïalam da ka National Peoples Party (NPP) ka don bynta ha ki kam khaii be-aiñ ïa u dewïong.
Kane ka jingkynthoh u Symbud Myntri Rangbah kala mih halor ka jingïai kynnoh jong u Nongïalam ka All India Trinamool Congress (AITC) Dr Mukul Sangma lem bad President ka Meghalaya Pradesh Congress Committee (MPCC) Bah Vincent H Pala ïa ka Sorkar MDA halor ka kam dewïong.
“Ha nga shimet nga sngew ba lada kino kino ki briew khamtam u Nongïalam ka Liang Pyrshah u sngewkhia shi sha halor kane ka jingkynnoh, balei ba kim leit ujor da ka mukotduma sha ka Ïingkashari lane sha ki Agency ba laitluid ba kin tohkit. Kine ki dei kiba lah ban sei madan ïa ka jingshisha” ong u Bah Prestone.
U Bah Prestone ula ong “Balei u Dr Mukul um shim ïa ka lynti jong ka Aiñ. Lada phi don ïa ki sabut, nga kyrpad ïa une u briew ba um dei ban shu pynmih ïa ki jingkynnoh tang ha ki kot khubor, phi dei ban ngam jylliew namar hangne ngi don ruh ki kynhun tohkit ba laitluid la ka dei ka CBI ne kiwei kiwei ki ban leh ïa kaba donkam”.
U Bah Prestone ula ong ba naduh u snem 2018 ba synshar ka sorkar MDA, da ki phew hajar tylli ki jingkyn noh kila mih pyrshah ïa ka Sorkar hynrei kila don ruh bun ki jingkynnoh kiba ka Sorkar kala thung ïa ka kynhun toh kit kaba shong kat kum ka jingshongkhia ka jingkynnoh.
“Hynrei ngim lah ban shu shimkhia ïa kat ki jingkynnoh kiba mih. Lada ngi pynsngap ïa baroh ki jingkynnoh ka Sorkar kan nym don por ban treikam. Nga sngew ba ki paidbah ruh ki sngewthuh ïa kine kiei kiei baroh” ula ong.
Haba kylli ba hato ka jingïai mih ki jingkynnoh pyrshah ïa u James K Sangma kan ktah ne em ïa ka Sorkar MDA ha ka elekshon ban wan, u Bah Prestone ula ong “Em, Ngam tharai. Wat ha ka por ka jingsynshar jong u Dr Mukul ba phra snem katba nga dang iadonlang, katno hajar tylli ki jingkynnoh kila mih pyrshah ïa ka Sorkar. Baroh ki tip ruh ïa kaei kaba jia ha kato ka Guest House hynrei kine baroh kila shu kut bad ïap hi dalade”.
Kumjuh ruh ula ong ïa u Dr Mukul “Haba phi la dei u riew saiñ pyrthei bala rang bad u Nongïalam ka Jylla, hashuwa ba phin kren, phi donkam ban pyrkhat shuwa ïalade bad dei ruh bansngewthuh namar kumba nga ong, baroh ki tip ïa kaei kaba jia naduh u snem 2010 haduh 2018 ba phi dang long u Myntri Rangbah ka Jylla…kiei ki ishu phi tip bha ïa baroh”.
“Tang namar ba mynta u dei u snem ialeh elekshon, phi la pyrshang ban thaw ïa ki jingkynnoh tang ban pynkulmar jingmut ïa ki paidbah” ula ong haba bynrap “Hynrei nga ïathuh ha phi ba ki Nongthep Vote ki kham stad ban iano iano ruh. To ngin sa ïapeit ha ka sngi ianiew ïa ki vote ïa kaei kaban jia”.
U Bah Prestone ula ong “Haba ïadei hi bad ka Sorkar MDA, khamtam lei ka NPP, ngin nang ïai bteng ban trei shitom bad ngin sa leit rung ha manla ki shnong ki thaw ban pynsngewthuh ïa ki paidbah bad ki nongthep vote ba kin ai vote sha ka NPP”.