Shillong, Jymmang 27: U Bah Banteidor Lyngdoh Myntri ki kam ïalehkai ka sorkar jylla u la kyntu ïa ki skul bad college ba kin sdang pyntreikam noh ïa ka sports polisi ha ki jaka pule jong ki.
“Nga kyntu ïa ki skul bad ki college kiba don hapoh ka jylla ba kin sdang ban pyntreikam noh ïa ka sport polisi kat ïa kaba ki lah ban pyntreikam bad na ka liang ka sorkar lyngba ka tnad sport ngin ïarap bad kyrshan ha kiwei pat ki bynta,” ong u Bah Banteidor Lyngdoh haba ai jingkren ha ka jingïalang kitbok ïa ki nong-ïalehkai kiban mihkhmat ïa ka jylla ha ka Khelo India Youth Games 2022 ha madan football jong ka SAI kaba don ha NEHU.
U la ïathuh ruh ba dang shen ha ka jingïalang ryngkat bad ki ophisar bad banjur ba kin peit bniah ïa ki kyndon kiba donkam kiba la pruid dak ha ka sport polisi khnang ban lah ban pyntreikam noh bad ban long ka lad ka kabu bad ka jingïarap na bynta ki khun samla.
“Ngam kwah ba ki samla kiba leit ïalehkai shabar bad kiba wanphai ryngkat ki takma ban ai ïa ki da ka pisa ba san hajar tyngka. Ngi donkam ban ai mynsiem bad ban ïarap na bynta jong ki bad kiba bun ki nongïalehkai kidei kiba wan na ki longïing baduk,” ong u Bah Banteidor Lyngdoh.
U la ai mynsiem bad kitbok kitrwiang ruh ïa ki samla ïalehkai kiban leit ïakhun sha Haryana ba kin trei shitom bad ïalehkai bha. “Nga kitbok kitrwiang ba phin ïalehkai bha bad wat sheptieng ka jingjop bad jingrem kadei ka bynta jong ka jingïalehkai hynrei ngam artatien ba lada phi ïalehkai bha phin ïoh kheit beit ïa u soh jong ka jingjop,” la ong u Bah Banteidor Lyngdoh.
