Shillong, Jylliew 5 : Hadien ba ki seng bhalang bapher bad kumjuh ruh ka Synjuk ki Nongsynshar Shnong ka Bri u Hynniewtrep (SNSBH) ki la dawa ba ka sorkar ka dei ban sei madan noh ïa ka kaiphod shah siat iap jong u bah Cherishterfield Thangkhiew, General Secretary ba rim ka seng HNLC ha u snem ba la dep, mynta sa u MLA ka Mawlai u bah P.T Sawkmie u la kyntu jur ïa u Myntri Rangbah ka jylla u Conrad K Sangma ban pynmih paidbah ïa ka kaiphod halor katei ka jingjia kaba la dep aiti sha u da u Nongbishar ba la thongthait uba khlieh ïa ka Commission u Justice T Vaiphei.
Haba kren ha u nongthoh khubor u bah Sawkmie u la ong “ Nga kyntu jur ïa u Myntri Rangbah ban pynmih paidbah noh ïa ka kaiphod namar na ka liang u Nongbishar u la dep aiti ïa ka kaiphod kumta ka sorkar kam dei shuh ban dang pynslem ban pynmih paidbah ïa ka kaiphod khnang ba ki paidbah kin tip shai halor ka jingshah siat iap jong u bah Cherish”.
U la ong ba u Justice Vaiphei u la dep tohkit da kaba shim jingthoh ïa ka jingkren bad jingphla kiba
haïing hasem, ki nongsakhi bad ki riew paidbah. Kumta ka sorkar kam dei shuh ban dang pynslem.
“ Ngam kwah ban ïohi ba ki paidbah kin ïamih surok biang na ka bynta ka kaiphod ka la dei ka kamram jongka sorkar hi ban sei paidbah ne pynmih paidbah khnang ban ïashai kdar halor kane ka jingjia namar haduh mynta ki paidbah ki dang sah ha ka umdum kumno la jia ka jingshah siat ïap jong u bah Cherish” ong u bah Sawkmie.
U la ong sa tang arbnai la dap shisnem ka jingshah siat iap jong u bah Cherish hynrei ïa ka jingtohkit wat la dep ban pyndep bad aiti ïa ka kaiphod sha ka sorkar katba ka sorkar pat kam pat pynmih paidbah kumta u kyntu jur ïa u myntri rangbah ban pynmih paidbah shwa ban dap snem ka jingkhlad noh jong u bah Cherish na ka jingjia ka jingshah siat ha la ïing la jong ha Mawlai Kyntonmassar.
