Khliehriat nailur 12: Katkum ka jingpyntip ba la wan na ka tnat India Meteorological la ong ba kan sa don ka jinghap slap ba jur ha ka jylla Meghalaya ha ka 11 tarik haduh 15 tarik mynta u bnai nailur 2024, kumta na ka liang u Deputy Commissioner ka East Jaiñtia Hills District, uba dei ruh u Chairman jong ka District Disaster Management Authority, u kyntu ïa ki paidbah ban long adkar bad phikir bha ban lait na kano kano ka jingjia ba sngewsih.
Lada ther jur u slap, la bthah ba ki paidbah ki dei ban shong khop ha ïing lada dei ki ïing kiba skhem bad kiba don hapoh ki kali ki dei ban shong beit hapoh kali bad khang ïa ki jingkhang ïit, dei ban kiar na kaba shong ha ki ïing rit, ha ki tent, ha ki trai dieng.
La bthah ruh ba dei ban kiar na kino kino ki wire electrict kiba iaid bor ding, dei ban kiar na kaba leit jngi sha ki um ki wah, kiar na kino kino ki jaka ba long lum sharing bad ki jaka ba don hajan ki um ki wah, lada don hapoh ïing dei ban khang bha ïa ki jingkhang bad ki jingkhang ïit, kiar na kaba pyndonkam ïa ki phone, kiar na kaba bat ïa ki nar kum ki tari ki wait ki shatri, lada mih shabar kan bha ban pyndonkam da ki jaiñ jri ne ki rain coat.
