Nongstoiñ, Jylliew, 20: Ka jingsiang rong ïa ka surok Nongstoiñ-Maweit ha ka wat kaba nyngkong ka pyndep haduh 23 kilomitar, kata ha duh ka shnong Mawdom bad kaba dang sah mynta ka dei satang ka jingkieng ha Wahlyngdoh hynrei ka lah ban shim por satang katto katne bnai.
Kaba bynta dang sah mynta ka don sa kumba 15 kilomitar ei ei haduh Maweit, hynrei ka jingpyntrei ïa katei ka bynta kaba dang sah ka la sdang naduh u snem bala dep. U bah T.Tyrsa uwei na ki riew rangbah ka thaiñ Maweit haba ïakren bad u nongthoh khubor, u la ong ba ka jingsdang ban pyntrei ïa katei ka surok na Mawdom sha Maweit ka la pynkmen ïa ki paitbah, hynrei ka jingpyntrei pat ka suki palat.
Kumta na ka liang ki paitbah ka thaiñ ki kyntu ïa ka Kompeni kaba pyntrei ïa katei ka surok ba kan ïaleh katba lah ban pynkloi, khnang ba ki paitbah ki lait na ki jingeh ha ka leit ka wan bad ka kit ka bah.
Nalor kata u la ong ba ha kane ka aïom lyiur ba jur palat u slap ki don ki jingeh namar ki don ki bynta kiba long ktieh, tangba ki kali kum ki Mahindra pickup bad ki Bolero ki biang hi ban ïaid lait noh ki kali rit.
U bah Tyrsa u la kyntu ruh ïa ka sorkar ba ka shimkhia lem ban pynurlong ïa ka surok na Maweit shaduh Nongjri South West Khasi Hills, namar katei ka surok ka long kaba donkam haduh katta katta ha ka kit ka bah, ka khaïi ka pateng bad kiwei kiwei. U la ong ruh ba lada don ka surok kaba bha haduh Nongjri, kan kyntiew ïa ka ïoh ka kot, ka kamai kajih jong ki paitbah jong ki shnong bapher bapher ha ka thaiñ.
