Kyntu ki paitbah ïa ka sorkar ban pyntreikam noh ïa ka sub health centre ha Mawkhiat

Nongstoiñ K’lyngkot 08 : Ka jingkoit jingkhiah ka dei kaba kongsan tam ha ka jingim ba man ka sngi bad ki jaka sumar kum ki hospital, sub health centre bad kiwei kiwei ki long kiba don kam ha man la ki jaka.
Haba phai ha ki jaka ai jingsumar jong ka West Khasi hills nalor ka Nongstoiñ Civil hospital ki don ruh sa ki Primary Health Centre bad ki sub health centre ha kaba ki ba bun ki sub health centre kiba ka sorkar lyngba ka tnad ka koit ka khiah ka la dep ban shna kidei kiba don ha ki nongkyndong.
Nalor kata ki don ki sub health centre kiba don ha ki nongkyndong kiba ym pat don ki surok kiba lah ban ïaid kali khamtam ha ka aïom lyiur.Kawei na ki sub health centre kaba don ha kyndong eh ha ka thaiñ kaba ym pat don ka surok kaba biang ka dei ka Mawkhiat sub health centre kaba la dep ban shna naduh u snem ba la dep hynrei ka bym shym pat lah ban plie haduh mynta bad naduh ba la dep shna wat tang ïa ki rud ki kiar ruh ym don satia ba pynkhuid.
Ha kaba ïadei bad ka jingpynslem jong ka sorkar ban pyntrei kam ïa katei ka jaka sumar u bah Pynshlur Lyngdoh uwei na ki nongïalamjong ka Synjuk Nongsynshar Shnong Mawkhiat Area haba ïakren bad u nongthohkhubor u la ong ba katei ka jaka sumar ka kynthup ïa hynriew tylli ki shnong ka Rynñiaw, Umaa, Mawkhiat mihngi, Mawkhiat sepngi, Mainop bad Mawïong bad ki paitbah nongshong shnong ki la don palat hynriewhajar ngut.
U bah Lyngdoh u la ong ba imat ka jingbuhteng jong ka sorkar ban plie bad pyntrei kam noh ïa katei ka jaka sumar ka dei namar ba ym pat don ka surok kaba ki kali sorkar ki lah ban leit shaduh katei ka jaka.
Ha kajuh ka por u la ong ba lada dei ha ka aïom lyiur ïa ki ba pang ba shitom naduh Umshem, Rynñiaw, Mawkhiat bad kiwei kiba donkam ban leit phah sumar sha Rambrai PHC bad sha kiwei kiwei ki jaka la hap ban kit da ki briew bad ïa ki longkmie ba armet lei lei la hap ban shu shna da ka krong ban pynthiah nangta sa rah ne kit da saw ngut ki rangbah haduh ban da poi ha shnong Mawdet kaba la don ka surok ban leit sha Mawrok bad Thiepkseh bad ka shim por haduh lai kynta shiteng haduh saw kynta ban poi ha katei ka surok.
U bah Lyndoh u la ong ruh ba haduh mynta ki shnong kiba hap ha ka Rambrai Jyrngam constituency ki dei ki shnong kiba ka sorkar ka la iehnoh beiñ haduh katta katta ym tang ïa kitei ki hynriew shnong hynrei ïa kiwei kiwei pat ki shnong naduh Rambrai haduh ki thaiñ Mawdoh.
Nalor kata u la ong ruh ba ka jingiehnoh beiñ jong ka sorkar kam dei tang ïa ki lynti synkien hynrei haduh ka pule puthi bad iwei kiwei ki bynta ba ki paitbah nongshong shnong ki don kam ha ka jngim baman ka sngi.
Khatduh eh na ka liang jong u bah Lyngdoh ryngkat ki paitbah nong shong shnong ki la kyntu jur ïa ka sorkar lyngba ka tnad ka koit ka khiah ba kan plie noh ïa katei ka jaka sumar bad bad pyntrei kam pura noh ïa ka khnang ba ki paitbah kin lait na ki jngeh ha ka por ba ki pang ki shitom bad ka jingdon kam ba ha khmat eh ka long ba ki longkmie kiba armet kin ïoh lad ban leit phah chekup man la ka sngi.