Nongstoiñ, Nailar, 11: Ka shnong Mawphanlur kaba don ha kliar jong ki lynter lum Mawthadraishan, ka dei ka shnong kaba la paw bha ha ka jingdon jong ki jaka jngoh kai kiba itynnad bha. Ka la kylla long ruh kawei na ki jaka kiba paw bha ha ka jingwan poi jong ki nongshangakai suwari na kylleng ki jylla bad wah na shabar ka ri ruh.
Nalor kata ki don ruh la ki nongpynïaid ha katei ka jaka, namar ka sorkar lyngba ka tnad jngoh kai ka la pynbiang ïa ki jaka sah, ki jaka bam, ki lynti ïaid kjat naduh Mawphanlur haduh kliar lum Mawthadraishan, kaba jngai kumba shi kilomitar shiteng. La ïoh jingtip ruh ba ka sorkar kan sa shna ruh sa kawei ka surok kali naduh Mawphanlur, kaba ïaid lyngba ka ïew Markasa ka ban pyniasoh bad ka surok PMGSY kaba kiew na Nongshilong shaduh kliar lum Mawthadraisan.
Hynrei haba phai pat ha ka jinglong jingman jong ka surok kaba ïaid na ïew Markasa, ha kine ki sngi la lap ba ka la sdang ban jot bad ban pra bun jaka ha kaba ka rong ka la khoh bad ki maw ki la paw lut shabar. Ha kaba ïadei bad ka jingsdang jot jong katei ka surok, u bah Bony Lyngdoh Lyngkhoi haba ïa kren bad u nongthoh khubor, u la ong ba ka sorkar ka la dei ban peit lem bad ban phah maramot noh ïa kito ki bynta kiba la jot, namar mynta ka jinglut ruh kam pat da bun hynrei lada kan shu ieh kumto, katei ka surok kan nang jot kham bun.
Utei u nongpynïaid jong katei ka jaka jngohkai u la ong ruh ba ki dang don shibun bah ki jingdonkam, ba ka Tourist Department ka dang don kam ban pynitynnad shuh shuh kum kaba thung dieng harud katei ka surok naduh Markasa haduh ban da poi ha ki jaka sah jong ki nongwan shangkai khnang ba kan long kaba itynnad. Nalor kata u la ong ruh ba lada ïa kitei ki jaka jngoh kai la pynbiang, kan nang khring shuh shuh ïa ka jingwan jong ki nongshangkai suwari bad kan long ka jingmyntoi kaba khraw ïa ki paitbah nong shong shnong bad kan kyntiew shuh shuh ïa ka ïoh ka kot.
Ha kajuh ka por u la ong ba ka surok kaba la shna haduh rud shnong Mawphanlur namar ka dang dei ka surok khyndew, ka la donkam ban maramot bad lada ka sorkar ka kwah ban kyntiew shuh shuh ïa ki kam jngohkai ka la dei ban phai khmat lem ha kaba ïadei bad katei ka surok.
