Nongstoiñ, Rymphang 10: Ki saw tylli ba kynthup ïa ka shnong Shiliangrynñiaw, Tlon, Umshynrut bad Umjajew, ki dei ki shnong ba ki paitbah ki im da ka rep ka riang bad u sohñiamtra soh jew, sohpieng, sohphan, ki jhur ki jhep bad kiwei kiwei ki dei ki mar rep kiba kongsan.
Nalorkata lada poi ha kitei ki shnong naduh u bnai Nohprah haduh Rymphang, ki bri soh ki stem hur bad phyrnai khrek, namar ki soh ki la ih bha bad kitei ki shnong ki dei kiba shalan sohñiamtra ha baroh ki ïew ki hat jong ka West Khasi Hills nalor ba ki nongdie kiba shong harud ka surok bah Shillong-Tura naduh Mawruksoiñ, Thiepjaphlang haduh lad Tumtum, ki dei kaba la pyndap soh na kitei ki shnong.
Ka long pat kaba lyngngoh ba haduh mynta ka surok kaba ki kali kiba leit sha kitei ki shnong, ka dei ka surok ba la shna da ka MNREGS kaba kitei ki VEC jong kitei ki saw tylli ki shnong ki pynïasnoh lang. Hynrei ha ka por lyiur pat namar ba ka dei ka surok khyndew ka jingsniew namar ka ngam bad ka ktieh kat haduh ba ki kali ki ba lah ban ïaid ki dei tang ki Mahindra pickup four wheel bad ki trok.
Ki riew rangbah katei ka thaiñ haba ïakren bad u nongthoh khubor, ki la ong ba ki paitbah nongshong shnong katei ka thaiñ, ki la shem jingeh haduh katta katta ha ka leit ka wan. Hynrei kim lah ban leh ei ei namar ka sorkar imat haduh mynta ka kheiñ ba ki nongshong shnong jong katei ka thaiñ ki dei tang ki shrieh ki tngaw.
Kitei ki rangbah ki la ong ruh ba naduh ki snem ba la dep, ki la leit ban ïakynduh ïa u bah Gigur Myrthong MLA ka thaiñ bad ki la kyrpad ïa u ba un ïarap ban phah maramot ïa katei ka surok, ha kaba u la kular hynrei haduh mynta ym pat long kam satia.
Ki la ong ba teng teng haba sahkut ki kali ha shiteng lynti, ki hap ban sahmiet ha khlaw, namar ban leit da ka kjat ruh kim lah namar ka jingdum ka miet. Teng teng haba sahkut kali ki dang poi ha shnong haduh ar bad lai baje mynstep, hynrei ki hap ban shah beit wat ha kitei ki jingeh ruh.
Ha kajuh ka por ki la ong ba haba don kiba pang ba shitom lada kit da ki kali ruh ha ka jaka ba ka jingpang kan kham jem, ka nang kham jur shuh shuh namar ka jinglynthem bad ka jingkyrthat jong ki kali ha ki jaka ba kim lah kiew na ka ktieh ba ki slip, kumta ki hap ban kit da u briew haduh ban da poi ha surok bah.
Ki la kyntu ïa ka sorkar MDA khamtam eh na u MLA ba mynta Bah Methodius Dkhar u ba don ruh ha ka liang ka sorkar, ba un phai khmat lem sha katei ka thaiñ, khnang ba kan long ka jingkyrkhu na ka bynta ki paidbah nongrep khamtam kiba pang ba shitom.
