Nongstoiñ, Nailar 2: Ka shong Rambrai ka dei ka shnong kaba la ïar bha kaba la jan ïa ryngkat bad ka Nongstoiñ kaba dei ka Headquarter jong ka West Khasi Hills District, namar ki shnong kiba don mar syndah ka kynthup naduh Mawthungmarwei, Mawkohïew, Mawrang, Rngi Lower Ïew Rambrai, Lawdibah, Umsiej, Nongkroh, Umjaut bad kiwei kiwei ki kyntoit shnong.
Ka thaiñ Rambrai ka kynthup haduh ki thaiñ Mawdoh shaduh ki thaiñ Kyrshai ha ba lada kheiñ ia ka jingdon jong ki shnong ka la poi sha ki shispah tam ki shnong.
Haba phai pat ha ki tnad treikam jong ka sorkar kiba don ha ka shnong Rambrai, ka don tang ka Primary Health Centre kaba shiphew jingthiah, ka Ophis kaba dei peit ïa ki jingri jingdup kata ruh ka jingtreikam kam pat da long kaba thikna bad ka tnad kynshew pisa jong ka Meghalaya Rural Bank.
Nalor kata ka don ka ïew Rambrai kaba ju long shisien shi taïew namar ka dei ka jaka pdeng jong ka thaiñ kaba ki paidbah ki hap ban wan man ka sngi ïew ban pynbiang ïa ki jingsiew jingtda haïing hasem.
Ha kaba ïadei bad ka jinglong jingman jong ki jingdonkam ba kongsan jong ki paidbah katei ka thaiñ, u bah L.Marbaniang haba ïakren bad u nongthoh khubor, u la ong ba kumba ka long mynta ka tnad treikam kynshew pisa jong ka sorkar kaba la don ha Rambrai, ka donkam kyrkieh ban pynbit pynbiang da ka Meghalaya Rural Bank, namar kawei pa kawei ka shnong ha ka thaiñ ka ïoh ban pyntrei ïa ka skhm MNREGS.
Bun na ki nongshong shnong ki don la ka jong ka jong ka job card, kumta ïa ka bai bylla ba la pynrung ha ki Account jong ki, ki hap ban leit sei na katei ka tnad kynshew pisa jong ka MRB kaba la don ha Rambrai.
Lada dei pat kiba na ki shnong kiba jngai kum na ki thaiñ Mawdumdum, Rangesohïong, Umïong bad kiwei kiwei ki shnong kiba jngai, ki hap ban leit phai kumta ka shem jngeh namar kim don kali satia kiba leit shaduh ki shnong jong ki.
U la ong ruh ba ki paidbah na ki thaiñ Umïong bad Umshem, ki hap ban ïaid kjat kumba san kynta tam, kumta lada dei ki kynthei ki shem jingeh haduh katta katta. Kumta, u la ong ba ka la don kam kyrkieh ba ka MRB kan kham pynbit pynbiang noh ïa katei ka tnad treikam, khnang ba kan pynsuk ïa ki paidbah.
