Nongpoh, Jylliew 20 : Uwei na na u nongïalam niam ka Evangelical Free Church of India, u Deacon S. Chinpu mynta ka sngi u la kyntu ïa ki paidbah ka jylla Manipur ba ki dei ban sangeh noh ïa ka jingïaumsnam kaba dei tang na ka daw ka jingsngew ïapher jaid bynriew hapdeng ki jaid bynriew Kuki bad ka jaid bynriew Meitei.
Une u Deacon S. Chinpu, u dei uwei na u riewniam ba la wan ban phet rieh ïa lade ha ka Shnong Pilangkata ha Ri Bhoi, kaba dei tang namar ka jinglong jingman ha ka jylla Manipur ba la poi shaduh u pud jong ka jingïaumsnam bad kaba la ktah ruh ïa ka shongsuk shongsaiñ shongsain ki paidbah haka jylla Manipur.
Haba ïa kren mynta ka sngi bad ki Nongthoh Khubor ha ka shnong Pilangkata ha Ri Bhoi, u Deacon ka Balang Evangelical Free Church of India, u S. Chinpu, u la ong ba kane ka jingïakhih bad ka jingïakynad ha ka jylla Manipur tang na ka daw ka jingïapher jaid bynriew hapdeng ki jaid bynriew Kuki bad Meitei ka la ktah shisha ïa ka shongsuk shongsain ki paidbah bad u la ong ruh ba kim poi pyrkhat ba kane ka jingïakhih kan poi shaduh u pud jong ka jingïaumsnam kaba ym don shuh kata ka mynsiem jingsngew para briew.
U la ong ruh ba kane ka jingïakhih bad ka jingïakynad ka la ktah shisha ïa ki paidbah ha baroh ki liang bad bun na ki nongshong shnong ki la kylla phetwir tang ban ioh ïa ka jingïada jong ka jingim bad ki don ruh kiba la ktah haduh ka trei ka ktah ka rep ka riang ha kaba kane ka jingïakhih la dei ban sangeh noh khnang ba ka shongsuk shong shongsain kan wan biang ha ka jylla Manipur.
Shuh shuh, u la bynrap ruh da kaba ong, ba bun ki nongshong shnong ha katei ka jylla ki la kylla nongphetwir na ka jingïakynad bad ban wan biang ka shongsuk shongsain, u la buh ruh kata ka jingkyrpad ban sangeh noh ïa kane ka kam ïa umsnam bad ban poi noh sha ka jingïasuk khnang ba ka shongsuk shongsain kan wan phai biang ha ka jylla Manipur, u la bynrap.
Na ka liang ki nonglam jong ka ZOMI Welfare Association hapoh ka jingïalam u Secretary, u S.K Mung bad ka HMAR Community, halor ka jingkloi ka dorbar shnong ban pdiang ïa ki ban sah shipor ha Pilangkata, ki la ai khublei kyrpang ïa ka Dorbar Shnong bad ïa ki bor pulit kiba la ailad ïaki ban ai jaka rieh ba shipor naka bynta ki briew ki jong ki bad naka liang jong ki ruh ki kwah ba kane ka jingïakynad kan poi noh sha ka jingïasuk namar la isynei ïala ki jong ki paidbah bad kim kwah ba ka jylla Manipur kan long ka jylla kaba ïa um snam.
