Shillong, Lber: Na ka liang ka Principal jong ka skul JNV Rymbai, East Jaiñtia Hills, ka RK Joshila Devi ka kyntu ïa baroh ki nonghikai kumjuh ki khynnah skul bad ki kmie ki kpa ba kin ïashim bynta lane ha ka prokram ka ban long ha ka 1 tarik u ïaïong 2022, ha ka por 11 baje mynstep ha ka ba u Myntri Rangbahduh ka ri u Narendra Modi un ïathir jigmut ryngkat bad ki khynnah skul bad ka ban ai shibun ki jingmyntoi khamtam ha kane ka eksamin ka ban wan lyngba ka jingkren jong une u myntri ka ri.
ïa kane ka prokram yn pynïaid da ka Doordarshan lyngba ka Doordarshan lyngba ka DD National News, kumjuh lyngba ka website PMO,MyGov.in bad lyngba ka youtube channel jong ka MoE, facebook live bad Swayamprabha channel jong ka MoE.
Ka jingthmu ha ka ba pynlong ïa kane ka prokram ‘Pariksha Pe Charcha’ ka long ban wanrah ïa kata jingsngew laitluid hapdeng ki khynnah bad ban pynïakynduh lang ïa ki para khynnah skul, ki kmie ki kpa, ki nonghikai bad ka imlang ka sahlang bad ka ban pynlong ruh ïa ki khynnah ba kin ïoh ban lehkmen, ban pynshlur ïa ki bad ruh ban ailad ba kin ïoh ban pynpaw ïa lade.
Ha kane ka prokram u PM Modi un kren ha ka ba ïadei halor ka phang; “Ka jingsheptieng jong ki khynnah ban ïaleh ïa ki eksamin, hynrei ka ba lah ban pynkylla ïa ki ba kin ym tieng shuh bad ruh ba kin poi sha ka thong ka ba ki thmu.
Shuh shuh u Modi un ai mynsiem bad pynshlur ïa ki khynnah ba kin pynduh noh ïa ka jingtieng, bad ba kin sngewtynnad ban leh bha ha ki eksamin ki jong ki khamtam eh ha kane ka por ka ba baroh ki la shah ktah na ka khlam jingpang Covid-19.
