Kyntu ka MPUF ïa baroh lai ki ADC ban pyrshah ïaka jingthmu ka sorkar ban siew tulop

Jowai, Nailur 01: Ka Meghalaya People’s United Front (MPUF) mynta ka lah sngi U Blei kala lum ïa ka jingïalang jong ka CEC bad la rai ban pyrshah ïa ka jingthmu ka sorkar ban siew tulop ïa ki lai tylli ki Autonomous District Council (ADC) hapoh ka jylla kata ïa ka KHADC, JHADC bad GHADC.
U President ka seng u Dapoiwanmi Laloo ula buh jingkylli lada ka don ka jingthmu jong ka sorkar ban leh ïa kane, hato ka don mo ka bhah kaba la dep mang kyrpang haka Dorbar Mang Tangka ka sorkar ban leh na ka bynta kitei ki lai tylli ki ADC.
‘Balei ka sorkar kam shim ïa ki lad ki lynti ban pynkhlaiñ shuh shuh ïa ki District Council katkum ka Sixth Schedule jong ka Riti synshar ka ri, khnang ba ki lah ban peit bniah bad ban siew dala de hi ïa ka tulop’. Ha ki snem kiba la leit ka sorkar kala thmu ban pynlong ïaka Election Municipal khamtam ha Jaiñtia Hills kaba long ka daw ba pynlong ïaka sorkar bad ka jingkwah ban siew ïa ka tulop jong ki, la ong u ma Laloo.
Ula kdew ba ki District Council ki long ki stieh ban ïada ïa ka khyndew ka shyiap bad ka jingthmu jong ka sorkar ka long tang ban pyntlod ïa ki District Council. U ong ruh kino kino ki project jong ka sorkar kmie ne ka sorkar jylla ki donkam ban ïoh ïa ka NOC na ki District Council bad kane ka jingthmu ka lah ban pynduh bor shuh shuh ïa ki District Council.
Halor kane ka bynta ka seng ka kyntu jur ïa ki District Council ba kin pyrshah ïa kane ka jingthmu ka sorkar namar ka lah ban ktah ïa ka bor jong ki District Council bad ka lah ban don da ki Panchayati Raj haka jaka jong ki Waheh Shnong.
Shuh shuh u ma Dapoiwanmi ula ong katkum ka Article 243 bad 244 jong ka Constitution ka batai shai halor ka rukom treikam jong ki District Council kaba ym ailad ïa ki Municipal ban leh ïa ki kam khem da ai bor da ki District Council. Kumta ka seng ka ïeng haka nongrim ban pyrshah jur bad ym pdiang satia ïa kane ka jingpynbeit.