Jowai, Risaw, 29: Ka Khooid Ya Ka Wah Myntdu (KYM ) ka la pynpaw ka jingsngewdiaw kaba khraw eh halor ka jingbteng jong ka jingshah pynjulor jong ka Wah Myntdu ha kine ki sngi, na ka daw ka jingkhar shyiap bad tih khyndew pathar ha ki bynta ba sharud jong ka Wah.
Dang ha kane 27 tarik mynta u bnai ka seng ka la sakhi ïa ka jingjaboh jong ka Wah Myntdu hadien ba la wan hap u slap tang katto katne minit bad kumjuh ruh ha ka 23 tarik jong une hi u bnai la don ki briew kiba tih khyndew ha ki bynta ka Lamynchi haneng jong ka Mupiah kaba la pynktieh lut shi lynter ïa ka wah haduh ki bynta ba tan ïa ka um bam jong ka tnad PHE (E) sha ki nongshong shnong ka Jowai.
Ka Khooid Ya Ka Wah Myntdu ka la pynsngew ba kane ka jingshah pynjulor palat jong ka Wah Myntdu kan ktah nyngkong ïa kiba duna ha ka jingïoh na ka bynta ban thied ïa ka umbam namar ki dang hap ban shañiah ha ka umbam na ka tnad PHE. Lada kane ka dang ïai bteng ka lah ban ktah bha ïa ka koit ka khiah jong ki paidbah, ong ka seng.
Ka seng ka la buh jingkylli lada kitei ki riew shim kabu ki dang bteng ïa kane ka kam pynjulor jong ki ka mut ba kim kheiñ shuh ïa ka koit ka khiah jong kiba bun ba lang bad ka lawei jong ka Wah Myntdu.
Halor kane ka KYM ka kyntu jur na u Deputy Commissioner ka WJHD u Abhinav Kumar Singh IAS, uba dei peit ïa ka jingeh ki paidbah ba un pynlong ka jingtohkit halor kane ka jingshah pynjulor bad ban pynshitom ïa kiba donkti katkum ki kyndon aiñ. Khnang ban shngaiñ kiba pyndonkam umbam umdih na kane ka Wah Myntdu khamtam ha kum kine ki por jong ka aiom Tlang.
