Riangdo, Jylliew 14: Ka KSU Mawshynrut Circle hapoh ka jingïalam jong u Samla Ulysis Ryntong General Secretary KSU Mawshynrut Circle bad Samla Jefferson Sohshang Assistant General Secretary KSU Mawshynrut Circle ryngkat katto katne ki dkhot, ki la leit ban ïakynduh ïa u Branch Manager jong ka Meghalaya Rural Bank (MRB) Seiñduli Branch mynta ka sngi ka 14 tarik Jylliew 2022 halor ka jingbym treikam bha jong katei ka bank bad haba ïakren ïatai ïa ki jingeh, la lap ka daw ba nyngkong ka jingbym biang ka network, ki update machine bad kiwei kiwei de.
Na ka liang jong u Branch Manager u la pynpaw ruh ba shibun ki jingdkoh haka jingtrei kam, hynrei la kular skhem hakhmat ki nongïalam ka seng ba un shimkhia ban pyntyllun janai ïa ka kam kumba long lem kiwei ki Bank.
Na ka liang jong ki Nongïalam ka seng ki la maham jur ïa ki nongtrei katei ka bank, ba kin nym shim sting ïa ka kam hynrei ban ai ka jingshakri ba paka ïa ki paitbah ka thaiñ katkum ka riti treikam ka bank, khnang ba ki paitbah ki lah ban shaniah ha katei ka tnad ha ka ban kynshew ïa ki pisa tyngka. Ki la kyntu ruh ïa ki paitbah ka thaiñ ban ïai shah shitom kumba shi sngi ar sngi, khnang ba kin lah ban pynbiang lut ïa ki jingduna.
Ka seng ka la ïoh ruh ban ïakynduh ïa u Branch Manager jong ka Meghalaya Rural Bank Riangdo, namar ka jingbym ñiewkor ki nongtrei ïa ki paitbah ba kynshew pisa ha katei ka tnad bad leh bym suidniew. Kumta ka seng ka la maham tyngeh ba kin ym dei ban pyni kum kita ki jait akor ïa ki paitbah ka thaiñ, hynrei ki dei ban long kiba sbun mynsiem ban ïarap ïa ki paitbah. Na ka liang jong u Branch Manager ruh u la kular ban pynïaid bad pynbeit ryntih ïa kum kita ki jait nongtrei.
