Kyntu ka KSU ïa ka Sorkar ban shna da ka App ban pynim jakpoh ïa ki nongniah Rapido

Shillong, Naitung, 14: Ka Khasi Students Union (KSU) ha kine ki khyndiat sngi ka la ïoh ujor na ki phew ngut ki samla Khasi kiba kamai da kaba kit nongleit jingleit da ki thuk thuk lyngba ki Apps ki bapher bapher kum ka Rapido halor ka jingkhang noh ka tnad Transport ïa kine ki Apps kaba treikam hapoh u pud u sam ka jylla Meghalaya.
Ka KSU ka sngewkhia shikatdei eh hadien ba la ïoh ïa ka jingujor ha kaba la sngewthuh da ki spah ngut ki samla ki duh noh ïa la ka jong ka jakpoh. Ka Seng ka sngewthuh ruh ba ka jingkhang jong ka tnad Transport ka lah ban dei ha ki nongrim kiba ïa dei bad ki aiñ ki kanun ka jylla, ong u kyrwoh ba la phah da u General Secretary ka seng u samla Donald V. Thabah.
Kumta lyngba une u kyrwoh, ka seng, ka kyntu ïa ka tnad Transport ban wad lad wad lynti ban pynïoh lad ïa kine ki samla ban kamai biang lyngba ki thuk thuk katkum ki kyndon aiñ ka tnad.
Kum ban shu ai nuksa, ka jylla Mizoram ha u snem 2017 ka la ai Permit ïa ki thuk thuk ban kamai kit ïa ki nongleit jingleit ha kylleng ka nongbah Aizawl lyngba ka Two-Wheelers Taxi Service. Shuh shuh ruh hadien, ka tnad Transport jong ka sorkar Mizoram ka la seng la ka jong ka Online App kaba la tip kum ka Huiva kaba ïa syriem bad ki Apps kum ka Rapido, Ola, Uber bad kiwei kiwei. Kane ka App ka dei kaba treikam beit thik tang ha Mizoram bad la pynïaid ïa kane ka App la leh hi da ka Sorkar Mizoram na ka bynta ka jingmyntoi ki nongkamai thuk thuk bad ki paidbah.
Ka seng ka sngew ba kumba leh ha Mizoram, ka Meghalaya ruh ka dei ban shim kumjuh kum kine ki sienjam ka ban long ka lad ai kam ïa ki samla .