Kyntu ka KSU ïa ka SDO Amlarem ban da pan syrnot shnong lada aplai EPIC ki mynder

Khliehriat, Jylliew, 4: Ki nongïalam jong ka Khasi Students Union (KSU) War Jaiñtia Circle ha ka Lah Sngi u Blei ka la aiti da ka dorkhas ha ka Sub Divisional Officer (SDO) Amlarem Sub Division ka Anenya Rashree da kaba kyntu ba ka dei ban pan da ka Residential Certificate ba la ïoh na ki Dorbar Shnong lada don kino kino ki mynder ri ne ki briew kiba nabar jylla kiba dang aplai ban ïoh pynrung kyrteng ha ka Electoral Roll.
Ha ka dorkhas ba la soi da u General Secretary samla Platini Mukhim bad ka Education Secretary ka Kong Ladaplin P. Hayong ki la pynaw ka jingsngewkhia namarba ha ka jingïohkem dang shen ïa ki mynder Bangladeshi na ka thaiñ War Jaiñtia ka seng ka sheptieng ïoh ba ki mynder kiba wan rung be-aiñ sha ka ri India kin ïoh ban pynrung kyrteng ha ka Electoral Roll.
Dei halor kata ka nongrim ba donkam ban pan ïa ka NoC bad ka Residential Cerificate khnang ban ïada ïa ka hok jong ki nongshong shnong.
Ka seng ka la kyrpad ruh ïa ka SDO, lada don kano kano ka aplikehson kaba wan na ki briew ki bym dei ki trai ri ne trrai jylla dei ban kyntait beit khamtam lada kim don ïa ka Aadhaar Card, ka Police Verification ki ban pynshisha ba ki dei ki nong India.
Ka Seng ka la pynpaw ruh ïa ka jingsngewkhia ba ïoh don ki briew ki bym dei ki trai ri ne trai jylla kiba pyrshang ban pynrung kyrteng ha ka Electorall Roll bad da ka jingïatreilang yn sa lah ban ïada na ka jingwan buhai shnong jong ki mynder Bangladeshi bad ki bar jylla ha ka thaiñ War Jaiñtia.
Ka SDO ka la kular ha ki nongïalam ka KSU ban shimkhia ïa kane ka kam bad ban tehlakam ïa ka jingwan rung be-aiñ jong ki mynder ri da kaba pan ïa ki kot ki sla kiba don ka jingithuh ruh na ki Dorbar shnong.
“Ka SDO Amlarem Sub Division ka la kular ruh ban ai ka jingïatreilang bad ka seng bad ka la ong ruh ba lada ka seng ka lap ïa kum kine kiba ïoh EPIC ka lah ban ujor beit sha ka ophis jong ka bad kan sa leh ïa kaba donkam,” la ong ka KSU.