Shillong, Nailur 17: Ka Khun Hynñiewtrep National Awakening Movement (KHNAM) ka la kyntu ïa ka sorkar jylla ba kam dei ban shah ïa ka Gau Dhwaj Sthapana Bharat Yatra ba la thmu ban pynlong da ka niam Hindu ha ka 2 tarik u Risaw ha nongbah Shillong.
Ha ka shithi ba la phah sha u Myntri Rangbah ka jylla u Conrad K Sangma na ka liang u Working President ka KHNAM u Bah Thomas Passah u la ong, “Namar kata da kaba buh ha ka jingmut jingpyrkhat bad ïa ka jingsngew jong ki paidbah ba bun bad kumjuh ruh na ka bynta ka suk ka saiñ ha ka jylla, ngi kyrpad ïa ka sorkar jylla ban pynthikna ba kam dei ban shah ïa ka “Gau Prathistha Andolan: Gau Dhwaj Sthapana Bharat Yatra” da kino kino ki briew ne ki kynhun seng.”
“Dei ban don ki sienjam da ka sorkar kan khang ïa kum kane ka yatra khnang ba ka suk ka saiñ kan don ha Meghalaya,” u la bynrap.
Ha kawei pat ka liang ka Hill State People’s Democratic Party (HSPDP) ka la ong ba ka lah ban don ka jingma ïa ka suk ka saiñ lada ka sorkar ka shah ban pynlong ïa ka yatra, kaba kyrpad ban pynbna ïa ka Masi kum ka kmie jong ka Ri kaba ki la thmu ruh ban pynlong ha Shillong ha ka 2 tarik u Risaw.
Ha ka shithi ba la phah sha u Myntri Rangbah ka jylla u Conrad K Sangma ha ka sngi Baar, na ka liang u President ka Youth Wing ka HSPDP u Bah Korbariang Syiemlieh u la ong, “Ngi kyrpad rit ba phin pyrkhat ba ka lah ban don ka jingthut ha ka shongsuk shongsaiñ ka ban lah ban mih ha ka jylla lada shah ïa ka Gau Rakshak ban pynlong ïa ka Yatra.”
Na ka liang u Bah Syiemlieh u la ong ba ka party haba kheiñ ïa ka bha ka miat ki jingri bad ka jingkhuid ka ngeit ba kane ka yatra ka lah ban pynmih ïa ka jinghuri hura bad ka ban ktah ïa ka suk ka saiñ ha ka imlang sahlang.
