Khliehriat Ïaiong 15:Ka Jaiñtia Youth Federation Saipung Circle, lyngba u President, u Oswald.B. Nampui, hynnin ka sngi ka la buh da ka jingthoh ha ophis jong ka Sub-Divisional School Education Officer East Jaiñtia Hills bad kyntu ïa ka sorkar ba kan shim khia bha ban kyntiew ïa ka jingnang jingstad ha ka thaiñ bad ban theh tyngka kham bun ha kaba kyntiew ïa ka stad ka tip.
Haba kren shaphang ki skul sorkar kiba don ha ki thaiñ Saipung, utei u nongïalam jong ka Jaiñtia Youth Federation uba na Saipung, u la ong ba ki don shibun ki skul sorkar kiba la shu shah iehnoh beiñ ha ka sorkar da ki bun bun snem, ki bym don wat tang ka ïing skul kaba biang ban pynlong skul “Ka jingbym don ki skul sorkar kiba bit ba biang ha ka thaiñ ka la ktah ïa ka jingnang jingstad jong ki khynnah .
Kumta ka seng ka kyntu jur ïa ka sorkar ba kan shim khia ban kyntiew ïa ka jingnang jingstad ha ka thaiñ khamtam kito ki jaka nongkyndong, namar katkum ka Performance Grading Index (PGI) jong ka Education Ministry, jong ka sorkar India la lap ba ka Meghalaya ka dei kawei na ki jylla kaba duna bha ki jingtei kum ki Infrastructure hapoh ka ri, u tei u nongïalam ka seng, u Oswald B Nampui, u la kynnoh pyrshah ba kane ka sorkar MDA ka la bakla ha ka rukom ban kyntiew ïa ka jingnang jingstad khamtam ha ki jaka ki ba dang long ki nong kyndong.
