Jowai, Jymmang 17: Ka Jaiñtia National Council (JNC) Western Zone mynta ka sngi saitjaiñ kala leit ban jurip ïaka rukom pyntrei ïaka surok Raliang-Sahsniang West Jaiñtia Hills District kaba don kumba 21 kilomitar ïa kaba la pyntrei lyngba ka skim PMGSY-III.
Ha kane ka jingleit jurip bala ïalam da u President ka seng u Hamehi Bamon hadien ka jingïoh ujor ïa ka jinglong jingman jong kane ka surok, na ka liang ka seng kala lap shisha ïa ki bynta jong ka surok kiba dang shu dep ban siang rong thymmai hynrei kila sniew noh bad ka jingsiang rong ïa ka surok la pyndep tang kumba 2 kilomitar ha ki bynta na Raliang sha Laskeiñ.
Ha ka juh ka por ka seng ka ai ka jingïaroh ïa ka sorkar kaba la pyntrei ïa kane ka surok shapoh katei ka thaiñ kaba pynïasoh ïa ki shnong bapher bapher bad la kyntu jur ïa ka company ba pyntrei ïa ka surok ba kan trei hok ban pyndep kloi ïa kane ka kam.
Ka JNC ka kyntu ruh ïa ka sorkar bad ïaka kompani ba kin sngewbha ban trei da kaba bha tam ïa ka surok kaba long katkum ka juk stad ba mynta, khnang ba ka surok kan long kaba neh slem.
