Jowai, Naiwieng, 09: Ka Jaiñtia Joint Alliance (JJA), ka la kyntu ïa ka JAC bad ïa ka MCTODA ban ïatrei lang bad ban weng noh shi syndon ïa ka jingïa sngewpher jingmut.
Ka Jaiñtia Joint Alliance (JJA), ba kynthup ïa ka JYF bad WJSU ka phah ïa ka jingkyrpad sha ki nongïalam jong ka JAC bad sha ki nongïalam jong ka MCTODA ban poi sha ka jingïasngew thuh jingmut bad ban ïatrei lang na ka bynta ka jingmyntoi bad jingbha lang jong baroh ki trai trok bad ki nong ñiah trok kiba don hapoh ka Bri u Hynñiewtrep.
Ka JJA kam sngew tynnad ban sngap bad ban ïohi ban don ka jingïasngew pher jingmut hapdeng para nongïa lam jong ki kum ki Association, namar lada long ha kane ka rukom ki kynhun ba nabar kham tam ki karkhana pynmih dewbilat ba don hapoh ka Bri u Hynñiewtrep ki ïoh lad ban shim kabu ïa ki trai ri trai muluk bad leh kat ba mon khlem patiaw ïa kano kano ka jingdawa ba shong hok bad ba don nongrim jong ki Association trai jylla.
Ha kajuh ka por ka JJA ka dawa ïa ka Sorkar Jylla khamtam ïa u Myntri ka tnat Kam Pohïing badei ban pynlait noh shi syndon ïa ki nongïalam ba la shah kem jong ka MCTODA khlem kano kano ka jingteh kyndon bad ban khot ruh ïa ki sha ka meij ka jingïakren bad pynurlong ruh ïa ki mat jingdawa ba shong ñia bad ba don nongrim jong ka MCTODA, la pynkut u kyrwoh na ka Jaiñtia Joint Alliance.
