Kyntu ka HYC ïa ka MeECL ban pynbiang bording thikna ha Ri-Bhoi Sepngi
![](https://mawphor.com/wp-content/uploads/2022/03/mawphor-1.jpg)
Nongpoh, Naiwieng 17: Kum kawei na ka seng kaba ieng ba shakri na ka bynta ka miat bad ka roi ka par ki paidbah ha ka thaiñ Ri Bhoi Sepngi, ka HYC, Ri Bhoi Sepngi ka la dawa tyngeh na ka tnad MeECL ba ka dei ban pynbiang bording thikna ïa ki paidbah ka thaiñ Ri Bhoi Sepngi, kiba ju mad jingeh na ka por sha ka por nakadaw ka jingbym biang ka bording kaba la pynsyrtok ïa ki paidbah.
Na ka liang ka HYC, Ri Bhoi Sepngi, lyngba u Publicity Secretary, u Samla John Makri, u la ong ba kum ka seng kam banse ban kren halor kane ka jingeh ki paidbah ka thaiñ Ri Bhoi Sepngi, kaba dei na ka jingbym biang ka bording ilektrik sha kiba bun ki shnong ba hap ha ka thaiñ Ri Bhoi Sepngi.
U la ong ruh kane ka jinglip bording kaba khah khah ha kum kane ka aiom ba ym don shuh ka u slap ne ka lyer ka la buh ïa ki paidbah hapdeng ka jinglyngngoh kaba khraw, ba kumno ka bording ilektrik kam ju poi thikna sha ki shnong ba hap ha ka thaiñ Ri Bhoi Sepngi.
“Kane ka jinglip bording ba man ka por ka la pynsyrtok shisha ïa ki paidbah katei ka thaiñ bad bun na ki paidbah nongshong shnong ruh ki ju kren bynñiaw bad pynpaw ka jingsyrtok, ba na ka por sha ka por ka tnad MeECL kam lah satia ban pynpoi thikna ïa ka bording ilektrik” ong u Samla John Makri.
U la kren bynñiaw ruh kane ka por ka dei ka por ba baroh ki khynnah skul bapher bapher ki hap ban pynkhreh ïa ka eksamin kut snem bad ki hap ban kreh ïa ki kot ki sla bad ka long pat kaba sngewkhia ba ki hap ban pyndonkam da ki sharak bad ki mombati ban khreh kot na ka daw ka jinglip ba khah khah ka bording ilektrik.
U la pynkynmaw ruh na ka por sha ka por ba la ju ïa kren halor ka 33 KV Power Station bad dei ban pyntreikam noh na ka bynta ki paidbah ka Ri Bhoi Sepngi bad kane ruh haduh mynta la shu kut tang ha ka jingïakren bad kam pat shym la urlong satia bad kaba lah ruh ban dei kawei na ka daw ka jingthud ka bording ilektrik ha katei ka thaiñ.
Namar kata ban lah ban pynbiang ïa ka bording ba thikna na ka bynta ki paidbah katei ka thaiñ, ka seng HYC Ri Bhoi Sepngi ka dawa na ka sorkar ba lyngba ka tnad MeECL ka dei ban shim khia ban pynbiang bording sha ki paidbah ka thaiñ bad ha kajuh ka por ruh ka seng ka dawa ruh na ka sorkar ba ka dei ban pyndep noh ïa ka 33 KV Power Station khnang ban lait na ka jingthud ka bording sha ki paidbah ka thaiñ Ri Bhoi Sepngi, la bynrap u Samla John Makri kum u nongïalam ka HYC Ri Bhoi Sepngi.