Shillong, Nailar, 26: U Chairman jong ka Political Wing ka Hynñiewtrep Achik National Movement (HANM) u Bah Lamphrang Kharbani ha ka sngi Thohdieng u la kyntu ïa ki paid nongshong shnong ka jylla ba kim dei ban pynshongdor ïalade bad ka khlieh sniang khlieh blang shwa ka elekshon ïoh ba ka jingdum kan wan lynshop biang ha kane ka jylla Meghalaya.
“Haba ngi thep ïa ka Vote bakordor jong ngi, ngi dei ban jied ïa u briew ne ka briew kiba don ïa ka thong bad ka jingïohi jngai, ka thong ka jong ki na ka bynta ka jylla ka dei ban long na ka bynta ka roi ka par, ban shna ïa ki aiñ kiba khlaiñ ban ïada ïa ka pateng ka ban sa wan,” ong u Bah Kharbani.
“Ki nongïalam kynsai kiba ngi la jied ki dei ban da pyntreikam hok ïa ki skhim jong ki paidbah bad ba kin ai jingkheiñ ruh ha manla u snem mang tyngka,” bad bynrap, ‘lada ngi bakla ban jied ïa u ne ka nongmihkhmat, ngi hap ban kynnoh ïa ki paidbah ruh ym shuh ïa ki nongmihkhmat.”
U Bah Kharbani uba dei ruh u President jong ka HANM u la ong, ba ki paidbah mynta kim sngewthuh shuh kumno ban jied ïa ki briew kiba kynsai ban phah sha ka Ingdorbar Thawaiñ namarba ki ïohi ba ka samoi elekshon ka long pynban ka kam tamasa shisien san snem, ka kam ïoh dih kyiad ei, ïoh ja ei, ïoh pisa ei bad ka kam ïaleh sngewbha kaba shisien san snem.
“Kum ka tnat treikam kaba peit ïa ka saiñpyrthei, ngi sngew ba ka ladei ka por ban pynsngewthuh ïa ki paidbah nongshong shnong bad kane ka jingkyntu jong ka HANM ka long kum shibynta ban ai jingpynshai sha ki paidbah bad ban pynsngewthuh sha ki nongshong shnong jong ka jaidbynriew, “la ong u bah Kharbani.
“Kane ka kam ban jied ïa ki nongmihkhmat sha ka Ingdorbar Thawaiñ la ka dei na ka bynta ka elekshon MP sha Parliament, la ka dei ka kam jied MLA sha ka Iingdorbar Thawain lane jied MDC sha ki Autonomous District Council kam dei satia ban long ka tamasa, hynrei ka dei ka kam im kam ïap kaba kyntang, lada ki paidbah ki kheiñ ba ka dei tang ka kam sngewbha kaba wan shisien san snem, kumta u Nongmihkhmat ruh ynda u lajop un sa pynlong kum ka kam sngewbha,” ong shuh shuh une u nongïalam ka HANM.
Haba pynpaw ba ki Nongmihkhmat ki dei ban don ruh ïa ka thong, u la ong, “ka thong jong ki nongmihkhmat paidbah ka long ba ki dei ban ïasaid ha Assembly ban plie biang ïa ki iew khappud, ban shna ïa ki aiñ ki ban pynneh pynsah ïa ka khyndew ka shyiap jong ka jylla, ki khlaw ki btap, ban pynkylla noh ïa ka Education Policy, ban pynkhlaiñ ïa ka rep ka riang, ban plie ïa ki karkhana khnang ban pynrungkam ïa ki samla trai muluk kiba la nang la stad kiba shong khlem kam khlem jam.”
U la ong ruh ba ki Nongmihkhmat ki dei ban dawa ïa ka Sorkar India ba kan pyntreikam noh mardor ïa ka Inner Line Permit (ILP), ban pynlong ain ïa ka hok longtrai halor ka khyndew ka shyiap, ban pynïoh ïa ka kyrdan Special Status kumba long ha kiwei pat ki jylla, ban ïapynbeit noh ïa u pud u sam bad ka jylla Assam lem bad ka ri Bangladesh, ban wanrah ïa ki surok, ka umbam umdih, ka bording, ka aspata bad kiwei kiwei ki jingmyntoi jong u paidbah.
“Ka Seng ka kyntu ïa ki paidbah nongthep Vote ba kim dei ban shim ram lypa, hynrei ki dei ban sngewthuh ïa u ne ka briew kiba kumno ban phah sha ka Iingdorbar Thawaiñ ka jylla, namarba kam don jingmut ban shu thmu bad ban babe kylla ynda ladep ka kam,” u la ong.
Ka HANM ka la kyntu ïa ki paidbah nongthep vote ba ki dei ban pyndonkam hok ïa la ka vote bakordor jong ki khnang ba ki jingdawa jong ka jaidbynriew bad ka jylla kin ym long kiba pulom.
