Shillong, Risaw : Ka Federation of All Meghalaya Adhoc Secondary Teachers Association (FAMASTA) ka la kyntu ïa ka tnat ba dei khmih ba kan pynsted ïa ka kam khnang ba kan lah ban pyllait noh kloi ïa ka tulop jong ki nonghikai kaba kim pat shym la ïoh la lai bnai mynta, kata naduh u Naitung, Nailar bad Nailur 2022.
Ha ka Seng ha u kyrwoh lyngba ka Secretary Kong M.Pyrtuh kala ong hadien ba kala ïoh pdiang ïa ka jingujor na baroh ki nonghikai jong ka jylla ha kaba ïadei bad ka jingslem jong ka tulop kaba la kyntiew thymmai ba la pynmih da ka sorkar katkum ka notification naduh ka 1 tarik u Naitung 2022, kumta ruh ka Federation kala shimkhia halor kane da ka ba leit ban ïakynduh ïa ka Director DSEL ka Kong RM Kurbah ha ka 21.10.2022 ha ophis treikam jong ka ha Secretariat.
Ka seng kala ong ba ha ka jingïakren bad katei ka Director, kala pynshai ba ka dang shu wan shimti thymmai ïa kane ka tnat bad kumta kan hap ban peit bniah shwa ha kaba ïadei bad kane ka tulop jong ki nonghikai.Hynrei, watla katta kala kular pat ba kan shimkhia ban pynkloi katba lah ïa kane ka kam.
Kumta ruh na ka Federation ka kyrmen skhem ba kane ka tnat kan pynsted ïa ka kam khnang ba kan ym buh jingeh ïa ki nonghikai ki bym pat shym la ïoh tulop mynta lah lai bnai kynthih.
