Shillong, Rymphang 24: Ka A’chik State Peoples’ Front (ASPF), mynta ka Sngi Baar, ka la kyntu ïa ki seng saiñ pyrthei ha Meghalaya ba kin pynduh noh mardor ïa ki tiket kaba la ai sha ki bym dei ki jaidbynriew Garo ba kin ïakhun ïa ka elekshon MDC sha GHADC.
Ka ASPF ka la phah ïa ka shithi sha u Myntri Rangbah ka Jylla u Conrad K. Sangma, u President ka Meghalaya Pradesh Congress Committee u Bah Vincent Pala bad sha u President jong ka Meghalaya Pradesh Trinamool Congress Committee u Bah Charles Pyngrope ban pynduh tiket noh ïa ki bym dei ki jaidbynriew Garo.
“Ngi lah ïoh ïa ki jingtip ba la ai tiket sha ki kyrtong ki bym dei ki Garo na 14 Betasing ïa ka elekshon MDC sha GHADC, khamtam ïa u Sanjay Koch na ka NPP, u Ajitav Koch na ka INC bad u Hemandra Hajong na ka TMC. Ngi kyrpad ïa ki seng ba kin pynduh noh ïa kine ka jingai tiket sha ki bym dei ki kyrtong Garo ha kane ka elekshon ban wan jong ka GHADC” la ong u Bernita Marak, General Secretary ka ASPF.
Ula ong, “Ka rilum Garo kadei ka ïing jong ki paid Garo bad kiba bun ki pyrshah jur ban pynïeng kyrtong da ki riewshimet ki bym dei ki jaidbynriew Garo ha ka elekshon ban wan jong ka GHADC. Kumta halor kane, ngi kyrpad ba phin khmih biang ïa ka rai kaba phi lah shim”.
“Ngi ngeit ba ka jingpynkylla biang ïa ki kyrtong ki bym dei ki Garo kan long na ka bynta ka bha ka miat jong ki jaidbynriew Garo bad kan long ruh ka jingpyni ïa ka jingangnud ka jongki” la ong u Marak.
