Kyntu ïa u Bah Kimfa Marbaniang ban pynsted ka jingleit rung NPP

Nongstoiñ, Ïaiong 01: Ka samoi ban jied ïa ki nongmihkhmat sha ka Ïing Dorbar Thaw Aiñ ka jylla ka sah satang shiphew bnai bad la jan baroh ki seng saiñ pyrthei ki la ïa pynkhreh bha ïa ki kyrtong ki ban ïakhun ha katei ka election. Ki don ruh ki seng saiñ pyrthei ki ba la don lypa ïa ki kyrtong hynrei ïa mynta kim pat kwah ban pynpaw ïa ki kyrteng jong ki.
Haba phai ha ki lai tylli ki Constituency kiba hap ha West Khasi, ka Nongstoiñ Assembly Constituency bad ka Mawshynrut ki la don lypa ïa ki sitting MLA kiba dei na ka NPP bad na ka Congress pat la don u sitting MDC u ban ïakhun kum u MLA. Nalorkata la ïoh jingtip ruh ba u MLA ka Rambrai Jyrngam ruh un sa kynthih noh sha ka NPP bad la thikna ba un ïoh ïa ka tiket ban ïakhun biang kum u MLA, katba ka Congress pat na kitei ki ar tylli ki Constituency kam pat pynbna satia.
Wat la ka Congress kam pat pynbna ïa ki kyrtong ha kitei ki ar tylli ki Constituency ruh, hynrei u bah Bormanding Nonglang District President jong ka West Khasi Hills District Congress Committee haba ïakren bad u nongthoh khubor, u la ong ba ka Congress ka la don lypa ïa ki kyrtong ha kitei ki ar tylli ki Constituency, hynrei ïa mynta um pat kwah ban ong ei ei ne ban pynpaw ïa ki kyrteng jong ki.
Haba kylli pat hato ki paitbah nongkyrshan jong u bah Kimfa S.Marbañiang ki sngew kumno lada un ïaineh ha ka Congress bad un ïakhun biang ha ka election, u bah Nonglang u la ong ba ka All India Congress Committee ka la dep suspend ïa u bad saw ngut kiwei pat. Kumta um don hok shuh ban dang kam ba u dei u MLA jong ka party Congress.
U la ong ruh ba lada u bah Kimfa u dei u briew u ba stad bad u ba don ka jingkitkhlieh na ka bynta ki paitbah ka Constituency, u la dei ban leit pynïasoh noh shisyndon kum u dkhot ba pura jongka NPP, khnang ba ki paitbah kin nang ban shim ïa ka rai la kin leit bud ïa u ne kin sah beit ha ka Congress.
Haba kylli pat ha kaba ïadei bad ka jinglong jingman jong ka saiñ pyrthei ha ka Rambrai Jyrngam Constituency, u bah Nonglang u la ong ba ki nongmihkhmat jong katei ka Constituency ki la shet kylla ym tang ïa ka party, hynrei ki la shet kylla ruh ïa ki nongkyrshan kiba la pynjop don burom ïa ki. U la ong ba ba naduh ba u bah Kimfa S. Marbañiang u la jop ïa ka Election MLA ha u snem 2018, ka party ka don ka jingkyrmen ba ha u snem 2023 ruh un dang jop.
Hynrei khlem poi pyrkhat ei ei khamakha u la shah ialam bakla, tangba wat la katta ruh ki nongkyrshan jong ka Congress kin ym kylla da lei lei hynrei kin ïaineh beit kumba ki long. U bah Nonglang u la ong ruh ba wat la ka Congress kam don shuh ki MLA barim kiba la kham tbit bad kham shem phang ha ka rukom trei kam, hynrei ka don ka jingkyrmen ba ki kyrtong kiba thymmai kin jop bad kin long ruh kiba kham shem phang, namar baroh ki kyrtong kiba thymmai ki dei kiba la bit la biang ha ka kyrdan pule.
Haba pyrshang ban twad jingmut na ki rangbah bad ki samla napoh ka Constituency, kiba dei ki nongkyrshan jong ka Congress ki la ong ba wat lada ka NPP kan ai tiket ïa u bah Kimfa S.Marbañiang ba un ïakhun kum u MLA ha u 2023, kan ym don jingmut satia ba kin dang kyrshan ïa u, namar um don jingïapher ei ei na u nongïalehkai phutbol uba shah sei red card ha madan.
Nalor kata ki la ong ruh ba lada u ïaleh na ka NPP, ka long thik kum u nongïalehkai phutbol u ba biej u ba phong ïa ka uniphom u Messi, hynrei ki paitbah nongkyrshan pat ki tip ba um dei satia u Messi.
Kitei ki rangbah ki la ong ruh ba ki la ïoh jingtip ruh ba ki don shibun ki nongïalam jong ka party kiba la mih noh ba kynthup ïa u Working President bad kiwei kiwei ki nongïalam ba hakhmat, kiba la leit bud noh ïa u bah Bajop Pyngrope sha ka NPP.
Ki don ruh ki nongïalam na ki shnong bapher bapher kiba la mih noh na ka party bad kiba la leit rung noh sha kiwei pat ki party. Ym lah ban len ba ka jingmih noh jong ki na ka party kan don hi ka jingktah ha ka election 2023. Watla katta ruh kin pyrshang katba lah ban trei shitom na ka bynta ban pynjop biang ha ka election ban wan.