Kyntu ïa baroh 60 ngut ki MLA ban kren noh da ka Ktien lajong hapoh ïingdorbar
Sdang hi u CM ban kren Khasi bad Garo ha Iing Dorbar
Shillong, Nailur 14 : “Lamphang, sngewbha ailad ba ki dkhot kin kren da ka Khasi bad Garo hapoh Iing Dorbar (Assembly),” kren u Myntri Rangbah ka jylla, Conrad K Sangma da ka ktien Khasi bad Ktien Garo haba jubab halor ka ‘call attention’ ba wanrah da u MLA ka Nongpoh Bah Mayralborn Syiem ha kane ka sngi Balang.
Katei ka jingkren jong u Myntri Rangbah kadei halor ka mat jingdawa ba la wanrah da utei u MLA ban pynrung noh ïa ka Ktien Khasi bad Garo ha ka Khyrnit kaba Phra jong ka Riti Synshar jong ka Ri.
Ym tang katta, u Myntri Rangbah u la banjur ruh ban ailad ïa baroh ki 60 ngut ki MLA ba kin kren noh ha ka Ktien Khasi bad Garo ha Iing Dorbar khnang ba kan long ka khubor sha ka sorkar pdeng ba ka jylla ka skhem ka nongrim ha ka jingdawa ban kynthup noh ïa kitei ki Ktien ha ka Khyrnit kaba Phra jong ka Riti Synshar jong ka Ri.
“Kane hi kan long ka khubor sha ka sorkar India ba ngi skhem ka jingdawa jongngi ban kynthup noh ïa ka Ktien Khasi bad Garo ha ka Khyrnit kaba Phra,” bynrap shuh u Myntri Rangbah da kaba kyntu ruh ïa ki riew paidbah ba kin ai jingthoh sha sorkar pdeng khnang ba kane ka mat jingdawa kan seisoh noh.
U Myntri Rangbah u la pyntip ruh ba u la ju kren ruh ruh bad ki heh jong ka sorkar India haba ïadei bad katei ka ishu.
“Nga la dep pynpaw ba kane ka jingïakhun ban pynrung ha ka Khyrnit kaba Phra kam dei satia tang banïoh jingithuh ka Ktien jong kano kano ka Jylla lane ka Jaidybnriew hynrei kan dei ka dak kaba paw ba ka sorkar India ruh ka burom bad ka ithuh ïa iwei pa iwei na ki,” ong u Myntri Rangbah.
Nalorkata, u ong ruh ba ka sorkar jylla kan ïai bteng ban buddien na ka sorkar Pdeng ba kadei ban kynthup noh ïa kitei ki ar tylli ki Ktien ha ka Riti Synshar jong ka Ri.
Hadien ba la dep kren u Myntri Rangbah na ka liang u Symbud Lamphang u la ailad ruh ïa u MLA ka Nongpoh ba un bynrap lang ha ka Ktien Khasi. Na ka liang jong u ruh u pynpaw ba lada baroh 60 ngut ki MLA ki ïatylli lang kan long ka jingkyrkhu ïa ka jylla bad ïa ki paidbah nongshong shnong baroh. U la ai ka burom ruh ïa baroh ki nongïalam kiba ha shwa jong ka jylla kynthup ïa kiba ha District Council, ki Khlieh Nongsynshar, ka Khasi Authors Society bad ruh ïa ka Achik Literature Society haba ïadei bad katei ka mat.