Kyntiew mokutduma ki pulit 62 tylli bad kem 14 ngut ki briew ba donkti tih dewïong be-aiñ ha EJH

Shillong, Rymphang 15 : Ki Pulit ka East Jaintia Hills, ki la kem haduh 14 ngut ki briew kiba donkti ha ki kam tih dewiong beaiñ ha East Jaintia Hills hadien ba ïoh ka jingujor ejahar haduh 62 tylli pyrshah ïa kiba donkti ha kane ka kam beain .
Ka jingkhynra ïa ki kam tih dewiong beaiñ hapoh ka District ka la jur bha hadien ba jia ka jingbthei ka par tih dewiong beaiñ ha Mynsngat-Thangsko, kaba shim ïa ka jingim ki 31 ngut ki nongbylla.
Kat kum ka kaiphod ba la aiti haba ïadei bad ki jingbishar ka National Green Tribunal (NGT), ka jingkheiñ ba la ai kat haduh ka 14 tarik Rymphang, ka pyni ba ki Pulit kila register haduh 62 tylli ki ejahar namar ka jingtih dewiong beaiñ, kynthup ki 5 tylli ba la ujor hashuwa ka jingbthei ka par ha Mynsngat-Thangsko.
Nalor kane, sa 5 tylli ki ejahar ki dei kiba ïadei bad ka jingshalan ïa u dewiong bad artylli ki dei halor ka jingïoh kurup ïa ki bom dynamite ba suba pyndonkam ha ka jingtih dewiong beaiñ.
Haduh mynta, 14 ngut ki briew kila shah kem na ki saw tylli ki case.
Na kine, 7 ngut kila shah kem haba ïadei bad ka jingbthei ka par ha Mynsngat-Thangsko bad kine ki dei kiba la ithuh kum u Forme Chyrmang, Shameki War, Process Phawa, Tensing Suchiang, Yoomiki Syih, Ernest Swer, Rangsing Syiemlieh ba ju khot sin u Mithun.
“U Ernest bad u Rangsin ki don mynta hapoh ka byndi ki pulit” ong u Superintendent of Police ka District Vikash Kumar.
Ki briew kiba shah kem ha lai tylli kiwei pat ki case ki dei kiba la tip kyrteng kum u Sahanaj Uddin bad Abansan Syrti (Umthe case), Narayan Majumdar, Salim Uddin Choudhury bad Safrul Islam Choudhury (Umpleng case) bad Rishna Sutnga bad Skhemborlang Kshiar (Umkiang case).
Ki bor Pulit ki la kurup haduh 15,224.72 metric ton u dewiong ba la ïoh lum jingkheiñ, bad dang don bun kiba dang ap ban kheiñ da ka Tnad Department of Mineral Resources.
Ka jingkurup ka kynthup ruh ïa 5 tylli ki kali, 25.5 kolo u bom gelatin bad 74 tylli ki detonator.
Ha kajuh ka por, ka Sorkar kala jer ïa ka kyrteng u Judge ba la shongthait RS Chauhan kum u Chairman ka Judicial Inquiry Commission ka ban tohkit ïa ka jingbthei ka par dewiong ha Mynsngat-Thangsko bad ki kam tih dewiong beain ha ka Jylla.
Kumjuh ruh ka Director General of Police (DGP) ka la thung ïa ka Special Investigation Team (SIT) ka ban tohkit ïa ka jingbthei ka par ha East Jaintia Hills. ïa kane ka kynhun tohkit yn khlieh da u DIG Vivekanand S Rathore bad ki ban iadon lang ki long u SP ka EJH u Vikash Kumar, Addl. SP u B Diengngan, DySP P.S Marwein DySP Eastern West Khasi Hills , Dy SP Basant Kr Mishra uba dei u DySP CCW bad CID, Shillong, Raksan Momin MPS. UBI Mathias Marak, UBSI Sherkhan Buam bad UBIS Edward Kharpran baroh lai ngut na EJH.