Shillong, Rymphang 02: Ka sorkar Meghalaya ka la pynmih ka jingpynbna ban kyntiew kyrdan noh ïa ka Garobadha PIC sha ka Police Outpost, kaba dang hab hapoh u pud u sam jong ka South West Garo Hills district bad ïa kane yn tip noh mynta kum ka Garobadha Police Outpost.
Haba kyntiew kyrpad ïa ka Garobadha Police Outpost kan kut noh ka jingtreikam jong ka kaba ju hab barabor hapoh ka Tura Police Station bad mynta kan long noh hapoh u pud u sam jong ka Damalgre Police Station.
Ki pud ki sam jong ka Garobadha Police Outpost ki long ka Selsella Police Outpost ba hapoh ka Tura Police Station ka West Garo Hills DEF ka bynta ba shatei; Ampati Police Station hapoh ka South West Garo Hills DEF bynta ba sha mihngi; ka Damalgre Police Station hapoh ka South West Garo Hills DEF ka bynta ba shathie bad ka Kalapani Police Outpost kaba hapoh ka Mankachar Police Station, Assam shaphang sepngi.
Ha kawei pat ka jingpynbna, ka sorkar Meghalaya ka la pynbna ïa ka jingaikam ban pynïaid ïa ka administration jong ka Purakhasia Police Outpost ka ban long hapoh ka jingpeit jong Superintendent of Police, South West Garo Hills district.
Shuh shuh ha ka jingphiah bad pynbeit kam thymmai ka Purakhasia Police Outpost kan ym hap shuh ki jingtreikam jong ka hapoh u pud u sam ka West Garo Hills district, Tura bad kan don noh hapoh u pud u sam jong ka Salmanpara Police Station hapoh ka South West Garo Hills district.
Ki pud ki sam ka Purakhasia Police Outpost ki dei ka Salmanpara Police Station kaba hapoh ka South West Garo Hills DEF bynta ba shatei; Gambegre Police Outpost hapoh ka West Garo Hills DEF ka bynta ba sha mihngi; Dalu Police Station hapoh ka West Garo Hills DEF ka bynta ba shathie bad ka Mahendraganj Police Station hapoh ka South West Garo Hills DEF ka bynta ba sha sepngi.
Ïa kane ka jingpynbna la ïathuh da u Commissioner & Secretary ka sorkar Meghalaya, ka tnat Home (Police).
