Kyntiew kyrdan ka sorkar ïa ka PIC sha ka Out Post ïa ka Garobadha, yn khmih ka SWGH

Tura, Ïaiong 9: Da ka jingthmu ban pynkhlain ïa ka kam pulit bad ban kyntiew ïa ka rukom synshar ha kane ka thain, ka sorkar Meghalaya ka la kyntiew kyrdan ïa ka Garobadha Police Inspection Centre (PIC) sha ka Police Out Post (OP) kaba hap hapoh ka jingpeit jong ka South West Garo Hills district.
Katkum ka kyrwoh khubor ba la pyllait da ka Ophis jong u Superintendent of Police, ka South West Garo Hills, kane ka unit ba la kyntiew kyrdan mynta kan treikam kum ka Garobadha Police Out Post.
Ka jingpynbna ka la pynbna ruh ïa ka jingpynkylla ïa ka bor synshar, ha kaba baroh ar tylli ka Garobadha PIC bad ka Purakhasia Out Post la pynkynriah noh na ka West Garo Hills district sha ka jingpyniaid jong u Superintendent of Police, South West Garo Hills, Ampati.
Hadien kane ka jingpynkylla kam, baroh ar tylli ki tnat pulit la shimti thikna na u Superintendent of Police, West Garo Hills, Tura bad la pyniasoh noh bad ka South West Garo Hills District Executive Force (DEF).
Hapoh ka jingpynbeit ba la pynthymmai, ka Garobadha OP mynta kan hap hapoh ka Damalgre Police Station, katba ïa ka Purakhasia OP yn hap hapoh jong ka Salmanpara Police Station.
Ki heh sorkar ki la ïathuh ba ïa kane ka jingpynkylla dur la pynlong na ka bynta ka jingsuk jong ki paidbah bad ban pynthikna ïa ka jingtreikam jong ki pulit kaba kham bha bad ka jingsynshar kaba ïaid beit ïaid ryntih ha ka distrik.